Shillong, Lber 28: U lat jong ka jylla u Satya Pal Malik ha ka sngi u Blei u la leit ban ia shim bynta sha ka jingialang bala pynlong da ka Lyngpung Seng Khihlang ha shnong Swer, ha ka jingkren la ong ba ka long kaba ioh mynsiem ban tip ba ka seng Khasi ka ialeh ban pynneh pynsah iala ka jong ka Riti ka Dustur bad u la ai ka jingkitbok halor kane.
Ka seng khasi ka juh pynlong ia kane ka jingiakynduh lang ba shisien shisnem jong ka seng Khihlang bad kane ka long kum ka jingiakyduh jong ki seng samla ka seng khasi, ha kum kane ka sngi da ki hajar ki khun samla kila ia poi ha kum kane ka jingialang.
Ha kane ka sngi la pyninam ruh ia ki rain tynrai bad ki rukom shad tynrai na ki dong bapher bapher jong ka Ri Khasi Jaintia, ha kane ka sngi kila don bun tylli ki shad tynrai bad ki riam tynrai katkum ki riti dustur u khun khasi khara na ka Bri u Hynniewtrep.
Ha kane ka sngi ki riew rangbah ki san jong ka seng Khasi kila ia don lang ban sakhi ia kane ka sngi bad ha kane ka sngi ki nongkren kila la sneng la kraw kumno ban pynneh pynsah ia la ka ka jong ka Riti Dustur kaba la ioh pateng naduh kulong kumah bad ban pynneh pynsah pateng la pateng.
Ha kane ka sngi la don lang ruh u MLA jong ka Sohra u bah Gavin Miguel Mylliem, Bah Samlin Malngniang, Bah Wailad Shylla. Kane ka jingialang ba ar sngi kala sdang ha ka 26 tarik sngi Saitjain bad la pynkut ha ka sngi u blei.
