Jowai, Iaiong 03: Ka KSU Saphai Unit ka la ioh ia ki nongkitkam ba thymnmai na ka bynta ka samoi lai snem ban dang wan myn ha ka 31/03/2014 bad ka jingpynbam smai ia kine ki nongkitkam bad ia ki dkhot baroh ka la long ha ka Iing Dorbar ka shnong Saphai. La jied ia u President da u samla Balawan Suchiang, Vice President : samla Wompher Tyngkan General secretary samla Wympherki Tyngkan bad Asst. General Secretary : samla Johny sayoo Finance Secretary : samla Shaphrangki Dhar, Sport Secy samla Decorate Schiang, Publicity secy : samla Pyrhat Pale , Asst Publicity Scy : samla Teibormi Sten bad kiwei de ki nongkitkam bad 10 ngut ki dkhot Executive committee.
La pynbam smai ia baroh ki dkhot da u samla Peter S.Lawai uba long u Asst. General Secretary ka KSU Central Body. Haba ai jingkren , une u samla rangbah u la pynpaw ia ka jingdonkam ba ki sengbhalang kum ka seng KSU kin long kiba khlain namar ba ka don khappud bad ka Assam ba ki jingeh kiba bun ki lah ban wan ha kano kano ka por. Ka long kaba donkam ban treilang bad ka shnong khamtam ha kaban buddien bad ia ka
jingtreikam jong ki skim bapher bapher bad ruh ban wadlad ban kynrong ia ka pule puthi khnang ba ki nongmihkhmat ne nongwei kin ym ioh shim kabu ia ki paidbah. Ka long ruh kaba Donkam ban tehlakam ia ka jingtuid kyrthep ki mynder ri bad ban khanglad ia ka shongkha khleh.
“Ka seng KSU ka don palat ia 500 tam ki unit bad ym duna ia ka 40,000 ngut ki dkhot. Ka KSU ka trei na ka bynta ka lawei ka jaitbynriew katba ki politician ne ki nongtrei Party ki trei na ka bynta ban pynjop ia ka party na ka bynta ka San snem”, u la pynpaw shuh shuh. U la kyntu ia ki samla ban imsngi ban trei minot da ka jingshlur, jinglehrit bad iaid da ka lynti ha kino kino ki kam khnang ba kin kiew ha ka jingim bad u kitbok kitrwiang ba ka KSU Saphai Unit kan long kawei na ki Unit ba khlain.
“Ngam lah sngewhun ban peit ia ka jingshah khniot ka jaitbynriew ha ki buit sianti ki bar jylla kum ha ki thain Ladrymbai ne wat ha shillong ruh bad nga sngew angnud ban trei ban pynkiew ia ka shnong ka thaw. Shane ngi ioh ia u surok uba sniew bad shibun ki jingshah banbein ha kiba bun ki liang”, la pynpaw u samla Balawan Suchiang ha kane ka
sngi.
La pyniaid ia ka jingialang da u samla Benison Kamar (General Secretary KSU Sahsniang Unit). Ha kane ka sngi la ia don lang u secretary ks u samla Leaningrad Tariang( General secretary) bad Garland Shadap(Edn. Secy) jong ka KSU Lakein Circle, Samla Really Nongspung (General secretary) bad samla Riskhem Kharkamni(Org. secy) jong ka KSU Mawryngkneng Circle bad kiweiki nongialam bad dkhot ka KSU Laskein Circle bad katto katne ki rangbah na ka shnong Saphai.(SP News)
