Shillong, Jymmang 01: Ha ka election MLA ha 43-Williamnagar Constituency ha ka jingianiew bote kaba la long mynta ka sngi u kyrtong jong ka NPP u Marcuise Marak u la jop da 4920 bote pyrshah ia u kyrtong shimet u Sengbath R Marak.
Ha ka jingianiew vote mynta ka sngi, u Marcuise Marak u jong ka NPP u la ioh 9656 bote bad u Sengbath R Marak Independent u la ioh 4736 bote, ka Debora C Marak INC kala ioh 4554 bote, katba ka Krinilla R Marak NCP kala ioh 4040 bote.
Kiwei ki kyrtong kiba la ioh bote ki long u Santosh R Marak u la ioh 870 vote, u Lahatson N Marak IND, u la ioh 512 bote, u Mahamsing M Sangma UDP, u la ioh 511 bote, u Jan N Areng IND u la ioh 329 bote, u Siljong R Marak IND u la ioh 233 bote katba kiba thep sha ka NOTA pat 279 bote.
U Dr W Kharlukhi State president jong ka NPP haba kren ha ki nongthoh khubor ha Shillong mynta ka sngi u la ai khublei kyrpang ia ki paidbah jong ka Williamnagar kiba la pynjop donburom ia u kyrtong ka seng ha kane ka election, da ka jingjop jong u Marcuise Marak ka jingdon jong ki MLA ka NPP ha ka iing dorbar thawain kala poi sha ka 20 ngut.
