Nongpoh, Iaiong 08: Kumba saw tylli ki shnong ha Ri-Bhoi mynta ka sngi ki la shah syllad bad shah khyrwit jem ha ka eriong bad u phria bad bun tylli ki ïing ki la julor bad kynthup ruh ia ki jingthung jingtep kiba don ha ki jaka rep.
Kane ka eriong bad u phria ka la wan kynsan ha ka por 2 baje janmiet bad ba la neh ruh kumba shiteng kynta ei ei ba la wan rah ia ka jingjulor ki ïing ki sem bad kumjuh ruh ki jingthung jingtep.
Kitei ki shnong kiba la shah ktah jur ha ka eriong bad u phria ki kynthup ia ka shnong Umdiker, Mawser, Wahlakhar bad ka Umshorshor kiba dei ki shnong kiba don tang kumba 9 km ei ei na Umsning ha Ri-Bhoi.
Haba ia kren bad uwei na ki nongshong shnong ka shnong Umdiker, u Bah Donbor Nongrang kum u nongshong shnong ha katei ka thaiñ u la ong ba kane ka jingwan kynsan ka eriong bad u phria ka la ktah jur ia kibun ki ïing ki sem, namar ka jinghap jong u phria uba la neh shiteng kynta ei ei u la pynpei lut ia ki tnum ing ba tap da ka
tin.
” Ka jingeh jong u phria ka la don kat ka ball ba ialehkai cricket bad dei namar kane ka daw ba wat ki tnum ïing ba la tap da ki tin ki la pei namar ka jingbom jong u phria uba wan ryngkat bad ka eriong” la ong u bah Nongrang.
U la iathuh ruh ba wat ka ïing jong u ruh ka la pei lut hadien ba la shah bom ha phria bad ka um slap ka la ioh ban rung shapoh ka ïing namar ba la pei lyngba na ka tin ba la tep hajrong tnum, u la ong.
Haba pyrshang ban kylli halor ki jingshah ktah jong ki ïing bad ki jingthung jingtep, u Bah Nongrang u la ong ba haduh mynta ngim pat lah ban ai ia ki kyrteng jong ki ïing kiba shah ktah, namar kane ka jingbom jong ka eriong bad u phria ka la ktah ia bun tylli ki ïing ha kitei ki shnong bad kaba shem jingeh ruh ban ioh lum jingtip noh mar mar hadien katei ka jingjia, u la bynrap.
Ha kawei ka liang, u phria u la ther ruh sha kiwei ki thaiñ ka district, kum sha ki thaiñ Umden Nongtluh, tangba ym pat shym la ioh ei ei ia ka khubor haduh katno u la pynjulor, namar u la wan ryngkat bad ka jingther u slap bad ka lyer, ryngkat ruh bad ka jingthut ka bording elektrik, kaba la ktah ia ki paidbah ban pyndonkam jingshai ha kane ka miet.(SP News)
