Shillong, Iaiong 15:Watla ka sorkar kmie lyngba ka tnad Ministry of Road and Transports ka la mana ban buh ia ki kyrdop khrong khajana ia ki kali kiba kit mar bad kiba kamai, naba ka ktah ia ka leit ka wan jong ki paidbah namar ki hab ieng ban siew pisa ha ki kyrdop ka wanrah ruh teng teng ka dheng kali bad khamtam ka ktah ruh ia ki trai kali nalor ba ki hab ban siew khajana sha ka sorkar bad ka District Council.
Ka Confederation of Ri Bhoi People (CORP) hadien ba la ioh ka jingujor na ki paidbah ka leit ban jurip ia katei ka thain ha kaba ka la lap ba ki kyrdop khajana jong ka District Council ki jyllei ha katei ka thain.
Ka seng ka la lap ka surok na 20 mer ban leit sha Patharkhmah-Jirang ki don kumba san tylli ki khyrdop lum khajana jong ka District Council haduh mynta. Kiba don ha ka shnong Narang, Lailad, Patharkhmah, Paham, Rani Jirang, Byrnihat bad kiwei kiwei.
Ha katei ka jingleit jurip ka seng ka lap nalor ki khyrdop jong ka District Council ki don sa ki khyrdop jong ka State Forest bad ki Syiem Hima, kata u Syiem Hima Nongkhlaw bad u Syiem Jirang jan man ki lad.
Kaba isangsot ka long ia kawei ka kyrdop ha shnong Narang kaba la shu pynieng da ka sing board ba la jot bad ki dak ruh yn ithuh shuh bad kane ka paw shai ba ka don jingkhrong pisa be-ain na ki kali. “Ka long ka jinglehrain ia ka Council ban iohi ia kum katei ka gate kaba wat ka sign board ruh yn ithuh shuh kumno kan khrong pisa na ki kali ,” la bynrap ka kyrwoh.
Halor kane ka CORP, ka kyntu ia ki bor jong ka District Council hapoh ka jingialam jong u Bah Ardent M Basaiamoit kum u Chief Executive Member (CEM) KHADC ban shimkhia ban peit bha na bynta ka jingpynieng ia ki khyrdop ne ki gate lum khajana, la ki dei na ka tnad forest ne revenue khnang ba ki paidbah kin ym iakynduh jingeh ne lut phut ha lynti syngkien.
Kumjuh, ka sorkar Jylla ruh ka dei ban shimkhia ban peit bha ia ki check gate jong ka, ba ioh ki long pynban ki mawjynthud ia ki paidbah trai jylla kiba khaii bad ki nongleit nongwan hapoh ka ri bad ka jylla lajong. Ia kane ka kyrwoh khubor la pyllait lyngba u Bah GS Hat Publicity secretary ka CORP. (SP News)
