Shillong, Naitung 30: U Chief Executive Member jong ka KHADC, u Bah HS Shylla mynta ka sngi u la kren shai kdar ba ka Atomic Minerals Directorates (AMD) kala iaid lait ia ki bor jong ka District Council dei na kata ka daw ba u Executive Member ba dei peit ia ki kam khyndew u la khot hajir ia ki bor jong ka AMD.
Haba kren ha ki nongthoh khubor mynta ka sngi, u Bah Shylla u la ong ba ki ophisar jong ka AMD kila iaid lait ia ki bor jong ka KHADC, ki jong ka sorkar jylla bad kum juh ia ki bor jong ka tnad trei kam jong ka AMD namar u myntri ka sorkar pdeng u la dep ban kren shai ba kin nym leh ei ei khlem ka jingmynjur jong ki paidbah bad ia kane la ai ruh da ka jingthoh.
U CEM jong ka KHADC u la ong ban lap ia ki jingshisha ia kaei kaba ka AMD kala leh hapoh Mawthabah ha ka sngi palei jong ka taiew ban wan kata ka long ha ka 02/08/2018 un leit hi ban jurip ia ki kam kiba ka AMD kala leh sha ki tei ki thain Mawthabah namar ka AMD kala leh khlem ka jingtip jong ka KHADC, wat ka sorkar jylla ruh kum juh.
Namar ba la khang ia ka AMD ba ymbit ban ksam Uranium kumba ka long mynta kane ka AMD ka wan ban rung bad rih ha ka kyrteng jong ka PHE. Na ka liang jong u CEM u la kynnoh ba ka AMD ka dei ka nongpynklumar shnong hapoh kane ka jylla, hato kam sngewthuh ia ka jingpyrshah ki briew ka jylla wat haduh ba ki kloi ban aiti ia la ka jong ka jingim.
