Jowai, Naitung 14: Sa shisien ka Behdeiñkhlam, ka shad niam ki khun Niamtre ka Raij Jowai, ka la wan biang. Man la u snem ha u naihynñiew (Naitung) jong u snem, ki khon ka Niamtre ki pynkhreh ia ka jing wan jong ka Behdienkhlam, ka Niam ha kaba U Trai kynrad najrong un wan hiar sha khyndew ban shong ban sah Saw sngi lai mied (Soo Sngi Le Iaw) bad ki khun u Hynniaw wasa u Hynniaw wasung. Ha kine ki Soo Sngi Le Iaw ki khun ka Niamtre ki ia shad ia kmen da ki ksing ki dhah, ki bhuri ki bikur ryngkat bad ka niam ka rukom ban pyndon burom ia u Traikynrad nongbuh nongthaw.
Mynnin ka sngi u Blei 13 tarik naitung ka dei ka sngi ba nyngkong jong ki Soo sngi Le iaw ha kaba ki khon Raij ki la wanrah ia u symbood Khnong na khlaw naka jaka baki pom bad leit buh ia u ha Lum Soiung Jowai. Hadien kane ha ka por janmied u Langdoh un leit peit ia u Khnong Blai, un rah ryngkat i Pyrnah i Pyrjin ba un ainguh aidem ia u Blei nongbuh nongthaw namar ba la iaidbeit iaid ryntih ka niam ka rukom, nangta bud pat sa ka Bam Tyngkong ha ieng ka Langdoh,ha shwa kine baroh ha ka por mynstep ki wasan ki lei lum leit lang ia ka Muhor ka Kynthiar kum shi bynta ka jingnoh syniang ki phra kur phra kmai ka seiñ Raij sha ka kam niam,haka por shiteng sngi ki khun Raij ki ai bam ia ki Sangia hala ki jong ki ing ki sem ki jongki.
Katba mynta ka sngi nyngkong 14 tarik naitung ka sdang da ka Knia Aitnar ha ka por mynstep katba ha ka por mynsngi pat ki Khun Raij jar laki Dong, kin wanrah ia la ki jong ki Deiñkhlam na khlaw bad pynpoi ia ki ha Iewmusiang. Ha ka 15 tarik pat kin sdang naduh ka por 4 30 baje mynstep baroh ki ing ki Khun Raij kin Pynieng ia ka Deiñkhlam hala ki Ing. Ha ka por 9.30 pat ki Khon raij kin rah ia u symbood Khnong na Loomsoing ban leit pynieng ia u ha Khiehchnong Chiliang Raij. Ha ka por 12 baje kin mih Na Mynkoi Pyrdi ban leit shad sha Iawmusiang bad sha ki thaw Niam baroh. Katba ha ka por janmied pat ki Khon Raij kin wanrah ia ka Khnong Blai sha Poh Sawiar hangta u Dalloi ryngkat ki rangbah na ka kur Nikhla kin Pyndep ia ka nguh ka dem hangta bad hadien nangta baroh ki dong kin rah noh ia la ki Deiñkhlam na Iawmusiang sha la ki jong ki jong ki dong ban pynieng ia ki.(SP News)
