Nongpoh,Jymmang 9: Ka seng Bharatya Janata Party kala pynlong ia ka jingialang paidbah ha Patharkhamah haka sngi saitjain ha kaba u president jong ka seng u Bah Shibun Lyngdoh u la kren ha kane ka jingialang paidbah. Ha kane ka jingkren ka jong u u la ong ba ka seng BJP kam dei ka seng kaba pyrshah ia ki khrsitan kumba la kynoh da ka kyrtong MP ka seng Congress ka Dikkanchi Shira ha Garo Hills.
Ha kane ka jingialang paidbah u tei un ongialam ka seng BJP u la ong ba ka seng kam don kano kano ka jingsngewpyrshah iakino kino ki kynhun hynrei ka kdup ia baroh ki jaid bynriew bad kum ka seng ka kwah ban tehsong ia baroh ki jaidbynriew ne kino kino ki jaid niam baroh
Ban kyntiew pat ia ka roi ka par bad ka ioh ka kot jong ki paidbah, u Bah Shibun u la ong ba donkam ia ki paidbah ban sngewthuh khambha ia u Aadhar number, kaba kane ka jingong jong u ka long ba baroh kawei ka
pyrthei ki lah ban pdiang ia uta u Aadhar number bad ki kiew ha ka ioh ka kot, balei hangne ha India bad ka jylla Meghalaya ki pyrshah ban wanrah ia ka ioh ka kot sha ki paidbah.
U Bah David Kharsati, kum u General Secretary haba pynkynmaw ia ka jingtreikam jong u Narendra Modi, kum u Prime Minister ka Ri India bad u nongialam ka BJP, u la ong ba u don ia ka jingangnud ban wanrah ia
ka synshar kaba khuid kaba suba ha ka ri hi baroh kawei. U la ong ruh ba ka angnud ruh ban wanrah ia ka ioh ka kot bad ka roi ka par kaba bha tam eh ha ki nongshong shnong ka Ri India khlem da kheiñ la ki dei na ka jaidbynriew aiu bad ki dei na ka jaid niam aiu, Hynrei ka jingpynthoh bria jong ki katto katne kiba pyrshah ia ka BJP, ka shong ha ki paidbah ban bishar tang ha kine ki khyndiat snem aiu ki la ioh jingmyntoi na ka BJP bad aiu ki la ioh jingmyntoi pat na ka Congress kaba la synshar jin 60 snem tam.
Ha kaba iadei bad ka jingshah kren beiñ ka BJP ha Ri India, ha ki katto katne ki nongialam seng saiñ hima ha ka jylla, u Bah David u la ong ba kiba bun na ki nongthaw aiñ ha ka jylla ha kine ki snem ba la dep ki dei kita ki Kristan, te aiu ki la leh pat ban kyntiew ia ka jylla naduh ka ioh ka kot bad kiwei kiwei, u la buh jingkylli.
Kiwei kiba la ai jingkren ki kynthup ia u Samla Ejenstar Kurkalang, ha kane ka sngi la don ruh shibun ki nongialam ka seng BJP kiba la kren ban pynshai ia kaba ka nongrim ka seng ka ieng.
