Shillong, Risaw 26: Ka jingpyni dur kaba ar sngi kaba bun bynta kan sdang lashai ha Sohra, Meghalaya ban rakhe ia ka Azadi Ka Amrit Mahotsav.
Ka Central Bureau of Communication, Regional Office (MT Region) Shillong kan pynlong ia kane ka jingpyni dur halor ka phang “8 Years of Seva, Sushasan and Garib Kalyan” bad Amrit Mahotsav ha Ramakrishna Mission Hr. Sec. School ha Sohra ha ka 27 bad 28 tarik u Risaw.
Ha kane ka jingpyni dur yn don ruh ki dur jong ki nongiakhih na ka bynta ka jinglaitluid ka ri kiba dei na ka thain shatei lammihngi ki bym shym la paw pyrthei watla ki la aiti ia la ka jingim na ka bynta ka jinglaitluid jong ka ri India.
Ki dur jong kine ki riewshlur, ha ryngkat ka jaka kaba kyrpang na ka bynta ki nongiakhih na ka thain shatei lammihngi kin long kawei na ki mat ba kongsan jong kane ka jingpyni ia ki dur.
Yn pyni ruh ia ki skhim bad ki sienjam jong ka Sorkar Pdeng ha kine ki phra snem ba la dep na ka bynta ka bha ka miat jong ki briew. Yn pynlong ruh ia ki jingiakhun bapher bapher hapdeng ki khynnah skul ha kine ki ar sngi kum shi bynta jong kane ka prokram.
U MLA ka Sohra, u Bah Gavin Miguel Mylliem un plie paidbah ia kane ka jingpyni dur ha ka sngi Palei ha ka jingiadon lang u Swami Anuragananda, Secretary, Ramakrishna Mission Ashrama, Sohra.
Ka nonghikai jong ka tnat History ha ka Women’s College, Shillong, ka Dr. Moushumi Dey, kan ai jingkren halor ka phang, “Unsung Heroes of Meghalaya”.
Baroh ki lah ban leit peit ia kane ka jingpyni dur naduh 10 baje mynstep haduh 3 baje janmiet ha ka 27 bad 28 tarik u Risaw, 2022.
