Shillong, Lber 07: U Myntri u ba dei khmih ia ka tnad ri jingri ka sorkar jylla u bah Sanbor Shullai ha ba jubab ia ka mat ia kren kaba la wanrah da u bah George B Lygndoh haba ia dei bad ka jingkiew ka dor dohmasi na ka daw jong ka jingpyntrei kam ka Assam ia ka Assam Cattle Prevention Act 2021
U Myntri ka jylla u la ong ba ka tnad ri jignri ka dang pyrshang ban ioh symbai da ki masi Ongole ban pynkhlain ia ka kam rimasi ha ka jylla . U la ong ba ka jingwan rah ia kine ki masi kan long ban pynkhlain ia ka jingri masi bad ban ym shaniah ia kiwei pat ki jylla ban pynbiang ia ki masi ia ka jylla.
U Myntri u la iathuh ba haduh 280 tylli ki permit ba la ai ia ki nongkhaii masi ban pynpoi masi sha ka jylla, kane ka dei ka jubab u myntri ba dei peit ia ka tnad ri jingri ka jylla u bah Sanbor Shullai mynta ka sngi ha iing dorbar thawain ka jylla.
Haba wan rah ia kane ka mat ia kren u MLA ka Umroi u la ong ba ka daw jong ka jingeh kaba ka jylla ka ia kynduh dei namar ba ka sorkar Assam kala pyntrei kam ia ka Cattle Prevention Act 2021 kaba la buh jingeh ban wanrah masi na Assam sha Meghalaya ha kaba u la ong ba kane ka dei ka buit kaba la ktah ia ka jignot doh masi ha ka jylla.
U bah HM Shangpliang u la ong ba kat kum ka jingioh jingtip na ki nongshohdoh,kane ka jingduna ban ioh wan rah ia ki masi sha ka jylla ka la pynkiew dor ia ka dohmasi ha ka jylla, u bah Process Sawkmie MLA ka Mawlai u la pynpaw ia ka jingsngew diaw ba ka don masi kala kiew dor sha ka T.450/- tyngka shi kilo.
