Ka dei ka deiti ka sorkar ban ialeh ban kyntiew ia ka bha ka miat ki paidbah, ong u Lat

Shillong, Lber 05: U Lat jong ka jylla u Satya Pal Malik haba kren ha ka sngi sdang ka dorbar mang tyngka 2021-2022  ka iing dorbar mynta ka sngi u la kren shai ba ka dei ka dieti jong ka sorkar ban ialeh ban kyntiew ia ka bha ka miat jong ki paidbah bad kane ka dei kaba la pynkup ha ka riti synshar jong ka Ri.

Dei halor kane ka nongrim ba ka sorkar kala shim ia ki lat ki lynti baroh ban ialeh ban kyntiew ia ka ioh ka kot jong ki paidbah lyngba ka jingsynshar kaba beit bad ba iaid ryntih, ka sorkar kala shim khia bha ha ka liang ka koit ka khiah, ka pule puthi bad ban kham pynlut ka jingpynlut ha kaba shna ia ki surok, ki jingkieng iaid kali, ka bor ding eletrik bad ka umbam umdih.

Ban kyntiew ia ka ioh ka kot jong ki nongkyndong, ka sorkar kala shim ia ki lat ki lynti kumno ban kyntiew ia ka rep ka riang, ka thungsoh, ka Ri Dohkha, Ri Syriar, Masi, Sniang bad kiwei kiwei de hynrei kitei kiba la kdew ha nenge ki long kiba kham kongsam kaba ka sorkar kan pyntrei kam.

Kiwei ki bynta kiba u lat ka jylla u la kdew ha ka jingkren jong u ka long halor ka shnong suk shongsain, la ong ba ha u snem 2020, kala don ka jingshong suk ha ka jylla wat la kala don ka jingiakhih pyrshah ia ka CAA, 2019 da ki seng bhalang hynrei la lah pat ban tem ia kine jingiakhih.

Haba phai sha ki khappud, u Lat u la ong ba ka jylla Meghalaya kala iakhap bad ka Ri Bangladesh haduh 444.8 km bad na kane 329.7 km la dep ban ker ksainar shiah bad ka sorkar kala rai pyndep ia ki jaka kiba dang sah, ka sorkar kala kut jingmut ban shim ia ki lat ki lynti baroh ban khanglat ia ka jingwan rung beain ki briew sha ka jylla.

Ka jingeh kaba ka sorkar ka ia kynduh ka long ba kumno ban leh ha kaba ia dei bad ka jingeh jong ki paidbah ha kaba ia dei bad ka jingdon jong ki bank, halor kane ka sorkar kala iateh bad ka Meghalaya Rural Bank ban iarap ia kito ki shnong kiba jngai na ki Bank da kaba buh ia ki “Banking Correspondents”, ia mynta ka jylla ka don haduh 45% ki shnong kiba jngai na ki bank bad kan ia leh ban pynduna da 10% ha ba kut mynta u snem.

Ha kane ka sngi sdang u Lat ka jylla ha ka jingkren jong u la ktah ia baroh ki tnad sorkar ia kaei kaba ki la leh bad ia kaei kaba ka sorkar ka thmu ban dang leh ha kane ka snem mang tyngka 2021-22.

 

What Next?

Recent Articles

Leave a Reply

Submit Comment

*