Shillong, Iaiong 14: Ka seng Hynñiewtrep National Youth Movement (HNYM) mynta ka sngi kala pynpaw ka jingbitar pyrshah ia ka seng ACHIK kaba la byrngem ban mudui sha ing bishar ba heh duh ka Ri India ka Supreme Court lada ka sorkar Meghalaya kam bteng ban pyntreikam iaka Roster System naduh u snem 1972.
Haba kren sha ki lad pathai khubor mynta ka sngi ha Shillong Press Club u bah Loius Dohtdong u la ong ba kane ka jingiai byrngem bad dawa ka ACHIK ban pyntreikam beit iaka Roster System naduh 1972 ka la pynkhih win ia ka jylla Meghalaya baroh kawei.
U bah Loius ula ong ba ka seng HNYM ka dap daka jingsngewkhia halor kane namar ka jingpyntreikam ia ka Roster system naduh 1972 ka la wanrah lypa ka jingduh nong ka ba khraw ia ki samla ka rilum Khasi-Jaintia Hills.
Ka seng kan nym pyrshah ia ka jingpyntreikam ia ka Roster System jong ka bhah thungkam lane ka Reservation Policy hynrei ka pyrshah tang ban pyntreikam naduh u snem 1972.
“Ka sorkar ka dei ban pyntreikam ia ka Roster System naduh u snem ba ka pynmih ia ka Office Memorandum (MO) lane naduh u snem ba ka sorkar ka mynjur ia ka Roster lane ka seng ka ieh ha ka jingstad jong ka sorkar naduh u snem aiu ban pyntreikam ia ka Roster, hynrei kam dei pat naduh 1972”
U bah Loius ula ong ba ka seng kam sngew dei ia ka jingdawa jong ki jaitbynriew Garo ban pyntreikam ia ka Roster System naduh u snem 1972 namar ba ka long ka ba noh shilliang tang ha ki jaitbynriew Garo kane ka la wanrah ka jingduh nong ia ki samla ka rilum Khasi-Jaintia Hills.
Shen ka seng kan sa leit ban kynduh ia u myntri rangbah ka jylla u Conrad K Sangma ban dawa ban khot noh da ka Special Session ban iathir ia ka jingdonkam ban bishar bniah biang ia ka Reservation Policy bad kumjuh ruh ia u snem ban pyntreikam ia ka Roster System.
“Ka seng ka long ka ba la kloi ban mih madan ban iakhun pyrshah iaka sorkar lada, ka jingpyntreikam ia ka Roster System ka iai neh beit 1972” la ong u bah Louis Dohtdong u President rangbah ka HNYM.
