Shillong, Iaiong 12: Ka rai jong ka Sorkar NDA hapoh ka jingialam jong ka BJP ban pynlong ia ka sngi 14.04.2107 kaba dei ka sngi Good Friday kum ka sngi ban rakhe ia ka Digital India Day ka long kaei kaei kaba pynsgewsih ia ki paidbah Kristan hapoh ka Bri U Hynniewtrep. Kane ka jingleh jong ka sorkar NDA hapoh ka jingialam jong ka BJP kam long shuh ka sien kaba nyngkong, kham mynshwa ki rai ia ka sngi 25 December Ka sngi Christmas kum ka Sngi Good Governance Day bad mynta ki rai ia ka Sngi Good Friday kum ka sngi Digital India Day.
Kane ka long kaei kaei kaba pynsngewsih, ka dei ka kam ban bein ne leh bein ia ki Kristan bad ka kam kaba pynkhein noh ia ka jinglong Secular jong ka Ri India. Ka Riti Pyniiad kam ka Ri India ka ai iaka hok ha baroh ki Nongshong Shnong ba kin mane Blei katkum ka jingsngewbit jong ki khlem ka jing pynthud ne pyndik jong kano kano ka bor sorkar bad dei ruh ban burom ia baroh ki jaid niam ha ka Ri India .
Ka HYC ka ong ba ym lah ban len ba ka BJP ka don ka jing iadei ba jan bha bad ka niam hindu hynrei kim dei pat ban pyndonkam ia ka Bor Sorkar ban kyntiew ia ka niam Hindu lane ban peit ibein ia ki wei pat ki niam. U Narenda Modi u lah ban mane Blei kum u Hindu hynrei um dei ban pyndon kam ia ka bor jong u kum u Prime Minister ban kyntiew ia ka niam Hindu bad ban leh bein ne peit bein ia ki wei ki niam khmtam eh ia ka niam Kristan.
Na ka liang jong ka HYC, ka dawa na ka sorkar NDA ba kan wengnoh ia kane ka rai ban pynlong Digital India Day ha ka Good Friday bad kumjuh ruh ban pynlong Good Governance Day ha ka Christmas bad ka dei ruh ban burom lang ia baroh ki jaid niam. Ka seng ka ai jingmut ruh ia kito ki dkhot jong ka BJP Meghalaya ki ban dang burom ia baroh ki niam ha ka jylla ba kin kren ia ki nong ialam jong ki bad lada kim lah ban leh kumne ka bha ban kin weng noh ia lade na ka tei ka party.
Kumjuh ruh ka HYC ka kyrpad ia baroh ki Seng sain pyrthei kiba don ka jing iadei ba jan bad ka BJP ba ki dei ban buh ka kyndon ba khlain ba ka BJP kam bit ban thombor ne lehbor ne peit beit ia ki niam bapher bapher lym kumta ka bha ba kin jngai lai lum laiwah na ka jing iadei ba jan bad kane ka party ka bana ka por sha ka por ka niew bein ia ka niam kristan. Ong ka kyrwoh na katei ka seng HYC.
