Shillong, Jymmang 15: Ka Family Strengthening Programme, jong ka SOS Children’s Village Shillong kaba ba don ha Uniam kala rakhe ia ka sngi burom “International Day of Families” mynta ka sngi ha kaba u MLA jong ka Nongpoh Constituency u Bah DD Lapang u la long u kongsan ha kane ka sngi.
Ki paidbah kiba la wan ban ia shim bynta ha kane ka sngi ki long na ka shnong,Umktieh, Mynsain, Pynthor bad Mawlyndep. Ha kane ka sngi kila don shibun ki jingialehkai, ki jingrwai ia kaba la ia rwai da ki nongwan ia shim bynta ha kane ka sngi.
Ia ka SOS ha Umiam la sdang ha u snem 2008 bad la seng ruh ia ka FSP bad ka kam jong kane ka long ban peit ha kaba ia dei bad ki khunlung khynnah kiba shah ieh bad ka kam jong ka, ka long ba ki khynnah kim dei ban shah leh lyndet ha kiba bun ki liang.
Ban iada ia ki khynnah ka long kmie ka dei kaba kongsan, nalor ba ka trei ban ia pyndap ha iing ha sem, ha ka juh ka por ka peit ban pynheh pynsan ia la ki khun ki kti, kane ka FSP ka ia leh bor bah ban nangai bor shuh shuh ia ki kynthei na ka bynta ban pynlong ia ka iing ka sem kaba sahlang.
Ka FSP kala lah ban ai jingiada haduh 289 ngut ki khynnah na ki 72 tylli ki long iing lyngba kane ka FSP, mynta lyngba jong kane ka FSP Shillong kila lah ban ai jingkyrshan ia ki 439 ngut ki khynnah na ki 116 tylli ki long iing. Ka FSP kala hikai ia ki khynnah ha ki ba bun ki liang kumno ba kin ieng hala ki jong ki kjat.
La hikai ia ki ba kumno kin kiew ha ka kamai kajih ka jong ki, kumno ba kin heh kin sa ha ka jingker jingda, ka bam ka dih jong ki khynnah, ka jingnang jingstad bad kumno ban ia beh ha ki jingpule kiba lah ban ai kam ai jam, la hikai ruh ia ki kynthei ba kumno kin ia trei kum ka kynhun bad ka jingiadei para khynnah. Ka FSP kan dang iai beteng ban ai jingkyrshan ia ki kynhun ban ia treilang.
Ha kane ka sngi la don lang ruh ka kong JJ Kylla ka Chairperson jong ka CWC jong ka Ri Bhoi District, ki heh sorkar jong ka tnad Social Welfare bad ki heh sorkar jong ka DCPU. Nalor jong ki la don lang ruh ki rangbah shnong jong Pynthor, Umkteh, Mawlendep bad Umktehpdeng bad bun kiwei kiwei ki rew paw khmat kila ia don lang.
