Shillong, Rymphang 17: Ka jingeh kaba ki nongot doh ha kane ka jylla Meghalaya ki ia kynduh jingeh ka dei na ka daw ba ka jylla Assam kala shna ia ka ain “The Assam Cattle Preservation Act, 2021” bad ka jylla Meghalaya haduh mynta kam don ain ha kaba ia dei bad ka jingot doh.
U Principal Secretary ka tnad ri jingri jong ka sorkar Meghalaya u GHP Raju la ong ba wat la kam shym don kata ka jingkhang ban ot doh ha Meghalaya, la shah ban wanrah ia ki mrad na Assam ban pyndon kam ha ka rep, ban ri bad ban pynmih dud dei na kane ka daw ba khlem pyndon ia ka ktien ot doh namar ym pat don ain ha Meghalaya.
La ong ba ka dei ka jingshisha ba la ai jingtip 30 tylli kiba lah ban wan kit Masi na Assam, hynrei ka ktien ot doh kam don bad na ka liang jong ki ot doh ki dei ban da pule bha ia ka ain “The Assam Cattle Preservation Act, 2021” kane ka ain ka shah ban kit ia ki masi ot doh tang ha kito ki jylla ba la don ia ka ain ban ot doh.
Haba ia dei bad kane ka sorkar Meghalaya ka dang pynkhreh mynta ban wanrah ia ka rule ha kaba ia dei bad kane ka kam ot doh ha kane ka jylla bad mynta ki dang pan jingmut na ka tnad ai jong ka sorkar ha kaba ia dei bad kane bad ynda la dep hap ban ioh ia ka jingmynjur na ka Kabinet.
