Shillong, Rymphang 06: Ka Tnat Statistics &Programme Implementation, National Sample Survey Office Field Operations Division Regional Office Shillong ka la pynlong ia ki survey ha ki kam bapher bapher ha baroh kawei ka India.
Ka Annual Survey of Industries (ASI) ka dei kawei na ki tyllong ba kongsan ia ka Industrial Statistics in India da kaba pynbiang ia ki jingtip statistic ban peit bad sngewthuh da ka jingshai shaphang ki jingkyllaha ka roi ka par jong ki kam pynmih mar kiba kynthup ia ki kam kiba iadei bad ki jingpynmih mar, ki jingai jingshakri ha ki kam maramot ia ki mar, ka jingpynbiang ia ka gas bad ka um bad ki lad ban buh pyndait-thah ia ki mar.
La ju pynlong ia kane ka survey man u snem hapoh ki kyndon jong ka Collection of Statistics (COS) Act, 2008 (kumba la pynkylla ha u snem 2017) bad ki kyndon kiba la wanrah ha kane ka ain ha u snem 2011.
Ha ka jingiatrei lang bad ka Umiam Industries Association la pynlong ia ka jingai jinghikai ba shi sngi ban ai jingtip bad ban plie lad ia ka jinglumdalade ia ka ASI returns lyngba ka rynsan internet ka ASI da ki Unit bapher bapher.
Kane ka camp ka la sdang da ka jingai jingkren pdiang sngewbha da u Dr. P. Das, Asst. Director, NSSO (FOD), RO, Shillong uba la pdiang burom ia ki karkhana kiba la wan iashim bynta. La don ka jingai jingkren na ka Kong M. Nongrum, Deputy Director, NSSO(FOD), RO Shillong kaba la kdew sha ka jingkongsan jong kane ka jingai jinghikai bad ruh ka Industrial Statistics.
Ka thong kaba kongsan jong kane ka camp ka dei ban ai jingtip kumno ban lum ia ka ASI data da ki karkhana bad ban pynsngewthuh ia ki shaphang ki jingai ka data lyngba ki lad online ha ka rynsan ASI.
Ka la kyntu ia ki unit ba kin ai sha ka ophis NSSO ia ki jingtip kiba shai khnang ban lait na ka jingphah ia ki jingtip ba bakla kaba lah ban ktah ia ka jingthaw ia ki polisi da ka Sorkar.
Kane ka data ka long kaba kongsan na ka bynta ka roi ka par jong ka ri. Ka la ong ruh ba kane ka survey ka iaidkatkum ka Collection of Statistics Act 2008 kaba donkam ia ka jingbud ryntih da baroh ki unit ban ai ia ka data ha ka por kaba biang. Ka la ai jingsngewnguhia baroh kiba la bteng ban iatrei lang bad ai jingkyrshan ha kane ka kam.
Na ka liang ki karkhana, u A Chakraborty, Deputy Manager, RiangdoVeenersPvt Ltd., u la ong ba ka data shaphang ki karkhana ka dei ban long kaba shai ban pynthikna ia ka jingiaid ryntih ka jingthaw ia ki polisi na ka bynta ki kam jong ki karkhana.
U la ong ruh ba haba sdang, ka la don ka jingeh ia ka karkhana ban ai jingtip dalade ha ka rynsan. Ka jingpynlongia kum kine ki jingai jinghikai ka la iarap bha ia ki ban ioh jingtip shaphang ka jingai jingtip ASI lyngba ki lad online ha ka rynsan ASI.
U la kyntu ia ka ophis NSSO ba kan pynlong shuh shuh ia kum kine ki jingai jinghikai ha ki por ban wan. La pynkutia kane ka camp ba shi sngi da ka jingai jingkren sngewnguh da u A .Pfozi, SSO, NSSO (FOD), RO, Shillong.
