Shillong, Iaiong 14: Ka synjuk jong ki nonghikai SSA bad managing committee jong ki skul SSA hapoh ka jylla, ka Meghalaya SSA Schools Association (MSSASA) ha ka kyrwoh bala phah da u bah H.M.Marbaniang General Secretary, ka kyrpad ia baroh ki School Managing Committee naduh ki skul mission , ki skul private aided kiba ioh jingiarap na ka SSA bad ki skul ba la seng lyngba ka SSA scheme ban iasnohkti lang bad iatreilang bad ka synjuk ha ka jingiakhih da kaba sangeh treikam kaba khlempud sngi jong baroh ki nonghikai SSA kiba don kumba 12481 ngut bad ki 4th teachers kiba don 1521 ngut kiba hikai ha ki 5000 tam ki skul kiba ioh jingiarap lyngba ka Sarva Shiksha Abhiyan (SSA) hapoh ka jylla ka ban sdang naduh 18 tarik mynta u bnai tad haduh ba ka sorkar jylla ka ai da ka jingthoh bad pyntreikam ia ki jingdawa jong ki nonghikai.
Ia kane ka rai la shim da ki hajar hajar ngut ki nonghikai SSA bad 4th teachers ha ka jingiaid paidbah ka ba la long ha ka 12 tarik mynta u bnai ha nongbah Shillong halor ka jingkuman bad sngap mynthi ka sorkar MUA-II ba lam khmat da ka Congress hapoh ka jingialam u Myntri Rangbah Mukul Sangma ban pyllait ia ka tulop thymmai bad Arrears jong ki 12481 hajar ngut ki nonghikai SSA kaba ki dei ban ïoh naduh u Ïaiong, 2016 katkum ka jingpynmih hukum da u Commissioner bad Secretary ka tnat pule puthi ka jylla uba long ruh u State Mission Director ka SEMAM ha ka 31 tarik Risaw, 2016, ban pynkiew tulop ïa ki 4th teachers kiba don 1521 ngut hapoh ka jylla kaba la shu sah teng naduh u snem 2013.
ka jingbymlah ban pynbeit ïa ki kynrum kynram jong ka result Diploma in Elementary Education (D.El.Ed) jong ki nonghikai kiba la leit sha hikai kyrpang jong u snem 2013 bad 2014 kaba la shu teng mynta lah shisnem tam kaba ka sorkar MUA-II ka la iateh soskular bad ka National Institute of Open Schooling (NIOS) ban hikai pyntbit ia ki 7822 ngut ki nonghikai ki bym pat pyndep ia ka professional qualification (D.El.Ed), ban phah training sa ia kiwei pat ki nonghikai SSA bad 4th teachers ki bym pat qualified katkum ki kyndon jong ka NCTE nalor kiwei kiwei ki jingdawa kiba iadei bad ka bha ka miat jong ki nonghikai bad ki skul SSA.
Ka jingsngap jar jong ka sorkar ka long ka jingkhniot bein bad iuhroit ia ka hok ki skul SSA bad ki nonghikai SSA bad 4th teachers kiba la shakri mynta lah palat 10 snem ban ai jingnang jingstad ia ki khun ki kti jong ngi ha ka jylla, bad ka sorkar kadei ban shim ka jingkit khlieh ha lade ia ki phew hajar ngut ki khynnah skul kiban shah ktah ha ka jingsahngeh treikam ki nonghikai, ong u bah H.M.Marbaniang General Secretary ka MSSASA Sengkmie ha ka kyrwoh.
