Jowai, Jymmang 23: U Rangbah Chui Lamin Polynjar uba long ruh u Daloi jong ka eleka Nongtalang ula pyntip ba ka jingialang kaba heh tam jong ki kur Lamin baroh kiba hiar pateng na ka Ïawchibidi bad Ïawshibijai kan long haka sngi Saitjaiñ 27 tarik ha H. Enowell Pohshna Memorial hall, Amlarem haka por 10:30 baje mynstep.
Kum ban shu pynkynmaw ka kur Lamin ka dei kawei na ki kur kaba heh tam ha ki thain War Jaintia kaba hapoh jong ka ki don bun phew kynnoh kum ka Lamin Pohlynjar, Lamin Pohsnem, Lamin Pohchen, Lamin Pohiing, ki Lamin Myrmen, ki Mohrmen, Lamin Kadew, Lamin Kadiang, Lamin Dumai, Lamin Kashnga, Lamin Kasah, ki Lamin Kayang bad ki laiphew tylli kiwei pat ki kyrteng kynnoh kiba ki ksiew ka ïawbei Ïawshibijai ka pyndonkam. U Rangbah Chui Polhlynjar u ïa wer lang ïa baroh ki khun ki ksiew ka Ïawshibijai ban ïa wan sha katei ka jingialum kur.
La khmih lynti ba ki khun ki ksiew ka Ïawshibijai na kylleng ki lum Khasi Jaiñtia kin wan ban ïakynduh lang ha kane ka lympung lum kur; la ong u samla J.F. Phsnem uba long u General Secretary jong ka Seng Kur Lamin, kane ka long katkum ka kyrwoh bala phah da u President ka Seng Kur Lamin ha War Jaintia.
