Nongstoin, Risaw 18: U myntri rangbah ka jylla u Conrad K Sangma mynta ka sngi u la ong ba lyngba ka skhim Focus ka jingiarap sha ki nongrep ha ka shisnem kan pot haduh T.500 klur tyngka ha ka shisnem.
Haba kren ha ka jingialang kaba la pynlong ha Nongstoin la ong ba ha ki shiphew snem ban wan ki nongrep kin ioh ia ka jingiarap na ka sorkar ka ban kot sha ka T.5000 klur tyngka kane ka pisa kan leit sha ki nongrep.
U myntri rangbah ka jylla la ong ba man ki nongrep ha ka jylla kin ioh ia ka pisa kaba T.5000/- tyngka na ka bynta u wei u nongrep lyngba ki kynhun bad ka don ruh kawei ka jigniarap kaba T.5000/- tyngka ha kaba khien lang ki nongrep kin ioh T.10000/-.
Ka jylla Meghalaya ka don haduh 4.5 lak ngut ki nongrep, ha West Khasi Hills District ki don 1957 tylli ki kynhun bad kane ka jingsam pisa kaba T.5000/- tyngka marwei na ka bynta kitei ki kynhun baroh kala kot sha ka T.62.85 lak tyngka.
Ha kane ka sngi u mytnri rangbah ruh u la sam ia ka pisa kaba la kot sha ka T.1.4 klur tyngka naka bynta ki 44 tylli ki shnong ba don ia ki kynhun ia treilang kiba dei tang jong ki kynthei.
U myntri rangbah ka jylla la ong ba ka sorkar lyngba ki skhim bapher bapher ba kala iarap ia ki nongrep ha ka jylla kala kot sha ka T.700 klur, na ka liang jong ka sorkar ka wat ki lat ki lynti kumno ban iarap ia ki nongrep ba kin kiew ha ka ioh ka kot.
Ha kane ka jingleit u myntri ranbah sha West Khasi Hills District la plie ruh ia ka ophis Krishi Vigyan Kendra ha Mawthadraishan kaba hap hapoh jong ka Eastern West Khasi Hills District ha ka jingiadon lang u bah Brolding Nongsiej MLA kane ka jaka ba dei ruh u myntri ka sorkar Meghalaya.
