Mairang, Jylliew 16: Ka Khastsawphra College bad Higher Secondary School, Mariang mynta ka sngi kala pyndon burom ia ki khynnah pule jong kane ka skul kiba la pass ha ka eksamin Higher Secondary School Leaving Certificate (HSSLC) ha ka Arts Stream bad Commerce bad kine ki dei ki samla pule ki dei kiba nyngkong kiba la pass na kane ka jaka pule naduh ba la seng ia ka ha u snem 2014.
Ha ka jingkren jong u Additional Advocate General jong ka sorkar Meghalaya u Bah W H D Syngkon u ba long u kongsan ha kane ka sngi u la ong ba ka jingkut jingmut bad kajingtrei shitom u wanrah ia u soh u bathiang, kaba pynkmen shuh shuh ka long ba kine kiba pass baroh ki dei ki samla pule kiba la ieh ia ka jingpule jong ki la bun bun snem hynrei da ka jingkut jingmut kila pule biang bad mynta kila poi sha ka jingjop da kaba pass ia ka eksamin HSSLC.
U Bah Syngkong u la ai ka jingiaroh ia ki nongseng ia kane ka college kiba la trei shitom ban seng ia kane ka skul bad u kyntu ba ki dei ban pynlong ia kane ka jaka pule kum kawei na ki shlem kaba ia ryngkatdor bad kiwei ki jaka pule kiba don ha ka Ri India. Na ka liang jong u u la noh syniang T.25005/- sha kane ka college namar kane ka college ka ieng hala ki jong ki kjat.
Na ka liang jong u Principal jong ka College u Bah Boldness L Nongum, haba pule ka jingpynkup burom sha kine ki san gnut ki samla kiba la pass na kane ka college u la ai khublei kyrpang ia ka Meghalaya Board of School education kaba la ai jingbit kyrpang ia kine ki khynnah ba kin thoh ia ka examin namar ki dei kiba la paw class la bun bun snem.
U la ong ba u Bah Maxlostine L. Kyllang uba la pass ha ka kyrdan kaba nyngkong u dei u ba la pep class la bun snem bad u shong dukan ha Mairang, u Bah Edifresh Kharlukhi u la duh jingkyrmen bay n dang ioh ban pyndep ia ka jingpule ka jong u hynrei kane ka college kala ai lad bad mynta u la pass kine baroh ar ngut ki dei na ka Commerce stream. Ka College kala phah saw ngut ki samla pule ban thoh exsamin bad ar ngut ki la pass bad u wei ha ka kyrdan ba nyngkong.
Ha ka Art stream, ka college kala phah lai ngut ki samla pule bad kine baroh lai ngut kila pass ia ka exsamin, kine ruh ki dei ki samla pule kiba la sangeh la bun snem na ka jingpule jong ki, ka Airisha L Nongbri kaba la pass ha ka kyrdan ba ar ka trei kam bylla ban pyndap ia ka iing ka sem hynrei da ka jingkut jingmut jong ka kala pass ia kane ka exsamin, u Emunsing L Mawnai bad ka kong Awarika Marnger kila pass ha ka kyrdan ba lai.
Ia ka jingialang ha kane ka sngi la pyniaid da u bah Lawanpynshngian War u ba dei u president jong ka Governing Body jong ka College, kiwei kiba la ia don lang ki long u Bah HP Kurbah SDSEO jong ka Mariang Civil Sub Division, u Bah Lawrence Basaiawmoit myntri jong ka Hima Nongkhlaw, ha kane ka sngi la don ruh ki jingrwaqi jingshad na ki khynnah ban pynphuh pynphing ia kane ka sngi bad ia ka jingkren ai khublei la ai da ka Kong A. War Vice Principal kane ka college.
