Shillong Naitung 8: U Chairman jong ka Public Accounts Committee (PAC) jong ka Meghalaya Legislative Assembly u Bah Paul Lyngdoh u la ong ba ka jingpep skul shiteng por jong ki khynnah ha kane ka jylla kala long kumba 20 persent, bad kane ka long kaba la bun palat, naka liang jong ka PAC ka ai jingmut ba dei ban ai jinghikai ei ha ki skul ban pynduna ia kane ka jingpep skul ba shiteng por.
Haba kren ha ki nongthoh khubor ha dien ba la wai ka jingialang hapdeng ki dkhot jong ka PAC bad ki heh jong ka tand pule puthi, na ka liang jong ka PAC kala ai jingmut ia ka tand pule puthi jong ka jylla ba ka dei ban wad ki lat ki lynti kumno ban kyntiew ia ka pule puthi ha ka jylla da kaba pyndon kam ia ka pisa kaba la shim na kit and sorkar bapher bapher ha ka dur jong ka Cess.
Halor ka jingpyntrei kam ia ka shim SSA, la ong ba ka jingbei pisa na ka bynta kane ka skhim ka long ha ka ration kaba 90 : 10, ka sorkar pdeng ka bei pisa 90 pc bad ka jylla ka bei 10 pc, ha ka jylla Meghalaya ha kine ki 16 snem kiba la leit noh ka jingmang pisa na ka bynta ban ai kot sha ki khynnah ka long T.150 tyngka ha ka lower primary bad T.250 tyngka ha ka upper primary kane ka jingmang pisa ka long kaba duna la ong u Bah Paul.
Dei halor kane ka jingduna palat ka jingmang pisa na ka liang jong ki nongshon kot ki salai ban shon ia ki kot kiba la buh da ka MBOSE namar kala rit palat ka dor, kane ka dei ka jingeh ha kaba ia dei bad ki kot.
La ong ban a ka liang jong ki ophisar jong ka tand pule puthi bun kim shym la lah ban ai ia ka jubab kaba shai ha kaba ki dkhot jong ka PAC kila buh, hynrei kila ai ka jingkular ban a ka liangjong ka tand pule puthi kin sa peit ia kane kajingeh. Naka liang jong ka PAC ka kwah ban iohi ba ia kane ka skhim SSA dei ban pyntrei kam ha ka rukom kaba biang bad ka sorkar jylla ka dei ban wad ki lad ki lynti kumno ban pyntrei kam ha ka rukom kaba dei.
