Shillong, Jylliew 30: ka North East India Business bad Cultural Integration Initiatives, ia kaba la pynlong da ka tand Industrial Policy & Promotion, jong ka sorkar pdeng bad ka Confederation of Indian Industry (CII) kala long ha Mumbai ha kaba u myntri rangbah kane ka jylla u Dr Mukul Sangma u la ia shim bynta lang.
Haba kren ha kane ka jingialang kum u kongsan u la ong ba ki jylla ka dong shatei lam mih ngi jong ka Ri India ki ia khap bad kiwei ki rib a marjan, hynrei kane ka jingpynlong ia kane ka jingialang ka long ka jingsdang ban pynjan ia ki jylla ka dong shatei lam mih ngi jong ka Ri India bad kiwei ki bynta jong kane ka Ri kaba khraw.
U myntri rangbah ha ka jingkren ka jong u u la ong ba ka jingpynduh noh ia ka North Eastern Industrial and Investment Promotion Policy, 2007 (NEIIP) kala ktah shibun ki kam pynroi ha kane ka thain ha ki kam karkhana, u la ong ba dei ban da peit bniah khamtam ha ki thain nongkyndong bad ban pynlong ia kane ka dong ka thain kum ka jaka jngohkai pyrthei.
Ban kyntiew ia ka roi ka par ha ka jylla na ka liang jong ka sorkar kala shim bun ki lat ki lynti namar ka jylla ka don ia ki briew kiba bal ah ban trei bad ha kane ka thain lah ban bei pisa ha ka liang jong ka rep ka riang, ki kam jngohkai pyrthei, ka pule puthi, ka koit ka khiah bad bun kiwei de bad ka jylla Meghalaya kan long ka jaka ba ki briew ki lah ban wan bei pisa ban seng ia ki ba bun ki kam.
Ha kane ka jingialang ki jylla kane ka thain shatei lam mih ngi kila kdew ba kane ka thain ka don ia ki lad ki lynti ban khring ia ki briew kiba don ia ka spah ka phew ba kin wan ban seng ia ki kam ki jam jong ki. Nalor jong u Dr Mukul la don ruh shibun kiba la kren ha kane ka jingialang.
