Shillong, Rymphang 14: Ka seng Hynniewtrep Integrated Territorial Organization (HITO) mynta ka sngi ka 14 tarik u Rymphang ki la leit ban buh da ka dorkhas ha khmat u symbut Myntri Rangbah u bah Prestone Tynsong u ba khmieh ia ka tnad kam poh iing ban pan jingpynshai ha ka ba iadei bad ka jingpynkynriah kam bad thung kam ia ki officer pulit hapoh ka tnad pulit.
Ha ba iakren bad ki ladpathai khubor ha Shillong press club na ka liang u President ka seng u bah Donbok Dkhar u la ong ba ka jingpyn kynriah kam ia kine ki officer pulit ka ia tyngkhuh bad ka Meghalaya police Act 2010.
Ha ka ba idei bad kane na ka liang u bah Donbok Dkhar u la ong ba na ka liang ka seng ka la pand da ka RTI ha kaba iadei bad kane ka bynta khnang ban ioh ka jingpynshai ha ka ba iadei bad ka jingpynkynriah bad thung kam ia kine ki pulit officer ha poh ka Jylla.
U bah Donbok u la ong ruh ba kat kum ka RTI ba la ioh la lap ba ka don ka jingpynkhein ia ka Meghalaya Police ACT 2010 namar kat kum ka jubab RTI ka ba ki la ioh ba ki don ki Officer pulit ki ba shu shah pynkynriah kam tang ha poh East khasi Hills District ymduna ia ka 15 snem khlem da shah pynkynriah ban trei sha kiwei pat ki district jong ka Jylla.
U bah Donbok u la ong ruh ba u shaniah skhem ba ha poh ka jingialam u Symbut Myntri Rangbah u bah Prestone Tynsong yn sa shim khia ia kane ka kam bad ruh u la buh ka jingkyrpat ba na ka liang ka tnad Pulit kan leh ia ka ba bhatam na ka bynta ka jingbit jing biang jong ki pulit.
