Mukhla, Nohprah 01: U Deputy Commissioner jong ka West Jaintia Hills u Arunkumar Kembhavie haba kren kum u kongsan ha kane ka jingleh burom ia ka jingdap 25 snem jong ka JNV School Mukhla u la ong “ Ka jingnang jingstad kam dei tang ban pass bha ia ki eksamin, hynrei ka dei ban but ryngkat ka burom ka akor”.
U la kyntu ia ki kmie ki kpa ki kynnah pule ba ki dei ban don ia ka thong ha ka jingim ka jong ki bad khamtam eh ynda ki poi ha ka klass kaba shiphew ki dei ban don ia ka thong aiu kin trei bad kaei kaba ki dei ban leh yn da kila dep ia ka jingpule ka jong ki kane ka dei ka kam kaba ki samla pule ki dei ban don lada shu pule khlem da don ia ka thong kan long lehnoh ei.
Ha kane ka sngi u la pynbna ruh ba u Chairman jong ka JNV Mukhla un ai ka khusnam ia ki khynnah kiba pule kot, ym tang ia ki kot skul hynrei ki kot kiba dan tei ia ka jingbieng jong u ne ka briew , u kyntu ia ki samla pule ba ki dei ban ia beh katkum ka juk jong ka jingkylla kaba mynta bad ban pynkhreh kham kloi ia lade ban poi sha ka thong ha ki jingpule.
U Bah A. Andrew Shullai, Dy-CEM jong ka JHADC ha ka jingkren ka jong u la ong ba ki khynnah kiba ioh ban pule ha kum kine ki skul ki long shisha kiba la shah jied kyrpang bad u la kyntu ia ki ba kin long kiba minot ia la ka jong ka kam jong ki ba kin kiew ha ka imlang sah lang.
Ha ka jingkren jong u SP jong ka West Jiajntia Hills u R Mathu u la ong ba ki khynnah kiba shah jie ban ioh pule ha kum kine ki long ki long kiba don bok tam na pdeng ki khynnah namar kiba poi sha kum kine ki jaka pule ki hap ban pass ia ki entrance Test. U la ong ba ha ka jylla kaba u wan ka Tamilnadu kam don ia kum kine ki skul namar ba kim kwah ia ka ktien Hindi.
Kiwei kiba la kren ha kane ka sngi ki long na ka liang jong ki khynnah skul ba rim jong kane ka skul, ki jingrwai na ki khynnah skul ba rim bad shibun ki jingialehkai na ki khynnah skul ban pynphuh pynphing ia kane ka sngi sah kynmaw ba kane ka skul ka rakhe ia ka jingdap 25 snem.
