Shillong, Lber 15: U Myntri Rangbah ka jylla u Conrad K Sangma haba jubab ia ka mat ia kren kaba la wanrah da u bah Lambor Malngniang halor ka khubor kaba la pymih ha ka “SP News Agency” kaba thoh “Mano ba thoh ha kynroh ki shipai suin ha Laikkor Peak ‘Trespasses yn Siait’.
Halor kane u myntri rangah ka jylla u ong ba ka kten shipai jong ka Eastern Air Command ka dei ka jaka kaba hap ban iada bad ia kane ka jingbthoh la thoh da ka jingbthah da ki bor ba ha khlieh jong ki shipai suin, dei na kane ka daw la khang pyrshah ia ki riew paidbah ban iaid lyngba.
U Myntri Rangbah la ong ba sngewtynnad ban iohi ba ki dkhot ka iing ki ai ka jingburom kaba kyrpang ia ki shipai kiba dei ki nongker nongda ia ka Ri, kane ka jingpynpyrkhing ban iada ia ki ktem shipai ka dei ha dien ka jingshah thom bor ka ktem shipai ha Pathankot bad Sunjuwan, dei halor kine ki jingjia ba ka sorkar pdeng kala pynmih ia kine ki jingthoh sha baroh ki ktem shipai ha baroh kawei ka Ri.
U Myntri Rangbah la ong ba ha dien bala sngap ia ka jingpynsngew jong ki dkhot ka iing dorbar haba ia dei bad ki jingeh kaba ki paidbah ki ia kynduh, u myntri rangbah la ong ba ka long kaba shongnia ia kaei kaba la pynpaw na baroh ar liang, na ka liang jong ki bor shipai bad na ka liang jong ki dkhot ka iing dorbar ba ki paidbah ki kynduh jingeh.
U nongai khubor na ka liang jong ki shipai la ong ba ka jingthoh kam dei ka jingbyrngem , ka dei tang ka jingmaham bad ka jingpyntip bad ia kum kine ki jingthoh la thoh ha baroh ki kynroh jong ki shipai suin ha baroh kawei ka ri, khlem da don kano kano ka jingpyrkhat ia kano kano ka dong ne ka thain.
Haba ia dei bad kane ka jingthoh kaba la wah ha kynroh na ka liang jong ki shipai kila pynlong ia ka jingialang paidbah bad ki shnong kiba don sawdong jong katei ka jaka bad ia ka jingialang la pynlong ha ka 25th Naiwieng 2019, kum kane ka juh jingialang la pynlong ha ka 19th Kyllalyngkot 2019.
Ha ka jingialang u Air Marshal ka EAC u la pynsngewthuh ha ka jingialang jong u OC ka Mawngap bad ki rangbah shnong la batai shai ia kine ki jingthoh la bthah ban thoh da ki bor ba halor jong ka tnad shipai suin ha baroh kawei ka Ri India.
Ki dkhot ka iing dorbar kiba la ia shim bynta ha kane ka jingiakren halor ka tei ka jingthoh nalor u bah Lambor Malngiang ba wah ia ka jingiakren, kiwei ki dkhot ki long u bah P T Sawkmie, Bah George B Lyngdoh, Kong Ampareen Lyngdoh, bah Charles Pyngrope bad u nongialam ka liang pyrshah u Dr Mukul Sangma.
