Shillong, Nailur 23: U Superintendent ki pulit jong ka South West Khasi Hills District u bah Maxwell B Syiem u la iathuh ba ka jingwad ia ki briew kiba la shah rong ha ka um ha thain Warsan Lyngdoh ka dang iaid sha khmat bad haduh mynnin ka miet na ki 6 ngut kiba jah la ioh ban sei tang kawei ka met.
Na ka liang jong u SP ka South West Khasi Hills District la iathuh ba ha kane ka jingjia ba sngewsih kiba shong ha ka Jeep kaba don ia u number ML-05Q-4115 ki don baroh 8 ngut bad kine baroh ki dei na ka shnong Mawjai.
Na kine ki phra ngut kiba la lait na kane ka jingshah rong um ki long u bah Marshal Myrthong 40 snem bad u bah Dapborlin Lyngdoh 25 snem kila lait na kane ka jingshah rong ha ka um da kaba ki la lah ban jngi.
La iathuh kiba ki briew kiba dei na ka kynhun bala phah kyrpang ki dang don ha katei ka jaka ban wad ia ki san ngut, kita ki long u Bah Ferdinand Myrthong 45 snem, ka hep Balamanbha L Mawlot 16 snem, ka hep Lapynshai L Mawlot 13 snem, kong Ibashisha Lyngdoh 24 snem, u khyllung Daman Lyngdoh ba dang shisnem hynriew bnai.
Kaba ki kynhun iarap kiba don ha katei ka jaka mynnin ka sngi kila ioh ban sei ia ka met jong ka kong Ladianghun L Mawlong 42 snem, ka kynhun pynlait kiba kynthup ia ka F&ES, na ka SDRF bad na ki Home Guard ki dang don sha katei ka thain Warsan Lyngdoh bad ka jingwad ia kiba dang jah ka dang iaid sha phrang, la ong u SP.
