Shillong, Naiwieng 11: Ka tamasa leh kmen halor ka jingwan dem biang jong ki lak tylli ki sim Amur Falcon ha Tyrso-Amru bad kiwei kiwei ki de shnong ba mar jan ia ka ba la tip ruh kum ka Amur Falcon Festival 2016 , la plie ha ka 11 tarik u Naiwieng ha ka shnong Tyrso Tngam. Kane ka tamasa leh kmen kan kut mynta ka sngi ka 12 tarik mynta u bnai hashwa ba kitei ki sim kin leit phai noh na katei ka jaka. Kitei ki sim Amur Falcon kiba wan naduh Siberia ha ka jingjngai kaba palat 22000 kilometre, ki la wanrah ka jingkyrkhu kaba khraw ïa kitei ki shnong ba don ha khappud bad ka Assam, namar kitei ki jait sim ki bam lut ïa ki khñiang bad ki puit kiba ju bam ïa u kba bad pynjulor ïa ki jingthung jong ki nongrep.
Ia kane ka tamasa leh kmen la pynlong da ka Tyrso Valley Wildlife Protection Society ha ryngkat ka jingiatreilang bad ka Synjuk ki Rangbah Shnong kum shi bynta ban pynnneh pynsah ia ki mrad khlaw bad ki sim ki doh ha katei ka jaka bad kumjuh ruh shi bynta na ka jingwan dem kitei ki sim Amur Falcon ka la wanrah ia ka jingkyrkhu kaba long ruh ka kum ka jingkieng ban kyntiew ia ki kam jngoh kai pyrthei bad kyntiew ruh ia ka ioh ka kot jong ki paidbah nong shong shnong. Kitei ki jait sim ki wan sha katei ka thaiñ naduh ka shiteng bnai jong u Risaw hadien ka jingwan jong ki na Nagaland bad kin sah hangtei haduh kumba shi bnai ei ei shwa ba kin her biang sha kiwei pat ki jaka.
Ha kane ka sngi plie ia kane ka tamasa la wan ban ia donlang da u Martin M Dango, u Myntri ba dei peit ia ka tnad kam pynroi ia ki surok ha ka sorkar jylla, u MLA ka thaiñ u Bah Julius Dorphang, ki ophisar sorkar , ki dkhot jong ka Society bad ki Rangbah Shnong, ki paidbah nong shong shnong bad kiwei kiwei. U Bah Dorphang ha ka jingai jingkren jong u, u la ong ba kiwei pat ki jingkyrkhu ba ka thaiñ ka ïoh kadei da ka jingwan ïalam jong u ïa u Myntri Rangbah, Dr. Mukul Sangma ha u snem ba la dep ban wan peit khnang ïa kitei ki sim ha kaba u la kular ban phah pynbha bad siang rong noh ïa ka surok kaba la sniew bha bad shi snem mynta ka la urlong ha kaba na ka 13 kilometer ka surok kaba sniew, u Myntri Rangbah u la mang 5 klur ban shna pynbha shwa ïa ki 9 kilometer bad kumjuh ba da ka jingïarap jong ka sorkar, u la lah ruh ban pynïoh haduh 1.17 klur na ka bynta ban shna ïa ka Multi-Facilitation Centre.
U la ong ruh ba ka thain bad ki paidbah kin kiew bha ha baroh ki liang namar ka don bun tylli ki jaka jngohkai pyrthei kumjuh kiba itynnad nalor ba ka la paw kyrteng bha da ka jingwan dem jong kitei ki sim Amur Falcon. Ha kane ka sngi la pynphuh pynphieng shuh shuh ia ka ne ka sngi sdang jong ka tamasa da ki jingshad tynrai kum Shad Thaïang, ka shad Rah Kynthei bad kiwei kiwei. Ha kane ka sngi la pynshog shit ruh da ki jingrwai na ka liang u Bah Renaldus Kharlukhi u ba la ai ia ka jingrwai ha kaba ia dei bad ki sim Amur Falcon bad kumjuh ruh na u Bah Charles Syngkli.
U Myntri ba dei peit ia ka tnad ban pynroi ia ki surok, u Martin M Dango ha ba ai jingkren kum u Kongsan, u la pynpaw ba na ka liang ka sorkar bad jingtrei shitom u MLA ka thaiñ u Bah Dorphang, kane ka shnong kan ioh pdiang shen ia ka jingsdang ban shna noh ia ka surok kaba 9 kilometre. “ Kum u Myntri PWD ngam nud ban kular hynrei ngan pyrshang ban iarap ban pynrung ia kine ki surok ha ka thup ban ioh jingiarap”, la ong u Myntri u ba la ai khublei ia ki paidbah nong shong shnong bad ki kynhun trei mon sngewbha halor ka jingshim khia jong ki ban iada ia ki mrad khlaw bad ki sim ki doh kumjuh ia ka maraiang. “ Ka jingwan dem ki sim Amur Falcon ka long ka jingkyrkhu ym tang ia kane ka thain hynrei ia ka ka jylla hi baroh kawei bad nga kyntu ba phin sumar bad pdiang ia ki da ka jing-sbun mynsiem khang ban kyntiew ia ka roi ka par lyngba ki kam jngoh kai pyrthei”, la pynkut u Bah Martin M Dango.
