Shillong, Rymphang 11: Mynta ka sngi ka party Cognress kala pynlong ia ka jingialang jong ka State Executive Committee ban ia kren ia ki jingkylla ka sain pyrthei ha ka jylla bad khamtam eh hapoh ka party kaba la jia ha kine kis ngi.
U President ka Meghalaya Pradesh Congress Committee bah Vincent H Pala ong ba ha kane ka jingialang la don kiba ong ba dei ban pynshitom ia kito ki MLA kiba ialeh pyrshah ia ka party, don kiba ong ban ia peit shuwa ia ka mynta ha dien ka jingiakren haba la shim ia ka jingsngew jong ki ba bun ia ka kaiphot yn phah sha Delhi mynta ka sngi.
U Bah Pala la ong ba na ka liang jong u kum u president ka MPCC um lah ban shim rai ban pynshitom ia ki hynrei ka ban pynshim ia ka rai ban pynshitom na ka lang ban weng shipor na ka party ne ban beh ia ki na ka party ka shong ha ka AICC namar ba ki dei ki MLA.
U President ka MPCC u la ong ba na ka jingiakren bad ki nongialam ka AICC, la sngewthuh ba kin sa pynshitom ia ki san ngut MLA, ka daw ka long haba ki leit ban kyrshan ia ka sorkar MDA kaba don lang ka BJP ki khlem kynjoh ktien ia ka MPCC lane ia ka AICC. Ka jingpyrshah jong ka Congress ba leit kyrshan ia ka sorkar MDA dei ban don ka BJP.
Halor ki jingkynnoh pyrshah ia u President ka MPCC, u bah Pala la ong ba hapoh ka party Congress ka don ka riti synshar jong ka seng ha kaba ki hap ban iaid katkum ki kyndon jong ka party, kum ka party ka hap ban peit ia ka jingdon kam ha ka jylla baroh kawei ym ia ki san ngut ki MLA.
Ha kane ka jingialang kiba la poi na ki san ngut ki MLA ki long tang ar ngut, u bah Mayralborn Syeim bad u Bah Mohendro Rapsang, katba u Bah Kimfa S marbaniang, bah Process T Sawkmie bad ka Kong Ampareen Lyngdoh ki khlem poi sha kane ka jingialang. Ha kane ka sngi la don lang ruh ki MDC.
U Bah Pala u la kren shai ba ym dei ba u kwah long President dei ki MLA ba kwah President thymmai bad haba ka party kala pynkham ti ha u ia kane ka kam, yn nym pyndem un trei la ka kam bad yn sa ia peit ha dien ka ilekshon jong snem 2023, ka jingleit jong ki MLA sha ka sorkar ka long na ka bynta ka jingmyntoi jong ki shimet.
