Shillong, Risaw 09: Ka KHNAM state youth wing ka ai ka jingkyrshan ia ka jingdawa jong ki nongshong iew ban wen noh ia ki nongsah beain ha iewduh bad ka seng ka dap ruh da ka jingsngew lyngoh ia jingbym shim khia bad ka jingbymlah jong ha Hima Mylliem bad ka KHADC ban pyrurlong ia ka jingdawa ki nongshong iew la bun bnai mynta.
La bun bun snem ka iewduh ka la kylla long ka jaka rieh tngen jong ki nongwei ki ba bylla ha iewduh kum ki nongbylla ba tador, bad kane ka dei shisha kawei na ki daw ki ba wanrah ia ka jingjakhlia bad ka jingbym shong shngain jong ka iew.
Ka Hima Mylliem ka dei ban shim ka jingkit khlieh kaba kham khraw halor ka jingjaboh bad ka jinghiar jong ka iewduh. Ka jinglum pisa jong ka hima mylliem man la u snem kam long kaba duna. Bad kadei ka jingshisha ba kam don ka jingshim khia jong ki myntri bad ka hima naka bynta ka iew ban wanrah ka jingkhuid jingsub bad ka jingshngain ia ki nongshong iew bad ki nongwan iew.
La bun ki ba wan jngoh ia ka iew hynrei ka iew kam kylla ka nangsniew kat nang mih ki sngi. Ka jingleit jurip jong u CEM bad ka jingialang haka 11 tarik mynta u bnai kadei ban long kaba myntoi ia ka iewduh, dei ban beh naphang ia kiba sah ha iewduh, u CEM bad ka KHADC kadei ban shim ia la ka jong ka bynta halor kane ym ban shu ai mon ia ka Hima bad ki Myntri ban leh katba mon.
