Shillong, Jymmang 10:U CEM jong ka Khasi Hills Autonomous District Council (KHADC) u Bah Pynshngianlang Syiem u la ong ba kin sa appeal ia ka rai jong ka ïingbishar Meghalaya High Court kaba iadei bad Limitation Act, 1963 ha ki jaka kiba hap hapoh u pud u sam jong ka jingpeit jong ka District Council Sixth Scheduled.
Haba kren ha ki nongthoh khubor ha dien ka jngiakynduh bad ki dkhot jong ka seng HNYF u la ong ba ka KHADC kan sa shong pyrkhat kumno ban leh ia kane ka kam, hynrei shuwa ban leh yn hap ban ia mir jingmut bad ki muktiar. Ka rai jong ka iing bishar ka lah ban ktah ia ka hok long trai jong ki riewlum ha kiba bun ki liang.
Katkum ka jinghukum ba la pynmih ha ka 12 tarik u Iaiong mynta u snem, ka Meghalaya High Court ka la ong -“Ka Limitation Act, 1963 kan treikam ha baroh kawei ka jylla Meghalaya kynthup ha ki jaka scheduled tribe jong ki Autonomous Districts.”
Haba iakren bad ki nongthoh khubor hadien ka jingiakynduh ia u CEM, u Secretary ka HNYF Bah Sadon K Blah u la ong, lada ym ialeh da ka lynti jong ka aiñ ia kane ka hukum ba la pynmih da ka High Court, kan ktah bad wanrah ia ka jingduhnong ia ka jaid bynriew khamtam ia ka District Council.
Katkum ka jingiathuh u Bah Blah u la ong, ka jylla ka don ia ki ar tylli ki bor shna aiñ, kata ka Sorkar Jylla bad ki Autonomous District Council. “Lada ka aiñ jong ka Sorkar Kmie la pyntreikam khlem da peit bniah ia ki kyndon jong ka Sixth Schedule, kumta kan long kaba ym don jingmut ban don ia ki district council.
Une u nongialam ka HNYF u la ong ba katkum ka jingpynbna ba la pynmih da ka Sorkar Assam ha u snem 1966, ka la kren shai ba kane ka Limitation Act kan nym treikam satia hapoh Meghalaya bad kumjuh ruh ha ka 22 tarik Jymmang 1989, u Secretary ka tnat Law, jong ka sorkar Meghalaya u la pynmih ka jingpynbna ba kane ka Limitation Act, 1963 kam treikam satia ha ki jaka schedule area bad sa kawei pat ka case kaba pynshisha ka long na ka William Mynsong Case, ha kaba ka ïingbishar Guahati High Court ka la ong ba ka Limitation Act kam treikam hapoh Meghalaya.
