Shillong, Kyllalyngkot 13: U president jong ka seng samla pule Khasi Student’s Union (KSU) u Bah Daniel Khyriem , mynta ka sngi u la ong ba ka seng kan pdiang ia ka polisi “Ia shim ia ai” na ka bynta ban pynbeit ia ka jingiakjia pud bad ka jylla Assam.
Na ka liang jong ka KSU ka iohi ba kane ka jingiakren kam poi shuh sha ei shaei ruh hapdeng kine ki ar tylli ki jylla, ka jylla Meghalaya bad ka jylla Assam, kaei kaba ka seng ka kwah ka long ba ka sorkar ka dei ban ai jingiada ia ki briew kiba don ha khappud bad ka jylla Assam.
Kum ka seng samla pule kam shym la shong thiat ban kren ha kaba ia dei bad kane ka bynta, bad kila juh kylli man ka por bad ka sorkar jylla bad kaei kaba jia ka long ba ki dang ia kren shi ia kren, ha kaba ia dei bad kane ka kam ka seng ka juh ia kren bad ka Assam Student Union bad ka Karbi Student Union ban ong ba peit kan nym don kano kano ka jingjia ba sngewsih.
U ne u nongalam ba rangbah jong ka KSU u la kynthoh ba ka sorkar Meghalaya kam juh leh ei ei ha khappud ban kyntiew ia ka roi ka par bad tang ynda la don ki jingjia ba sngewsih ka sa kyndit byrniew katba ka jylla Assam pat ka wan ban kyntur pud da kaba pynpoi ia ki kam pynroi kiba bun rukom.
Haba ia pynbeit ia u pud u sam hapdeng kine ki ar tylli ki jylla na ka liang jong ka seng ka kwah ban ong ba lada poi ha u pud ba dei ban ia pdiang ia ka ia shim ia ai ka dei ban don ka jingpan jingbit na ki paidbah sha ei ki kwah ban leit ym ban shu ia pynbeit hapdeng ki ar tylli ki sorkar.
