Shillong, Jylliew 28: Ka Khasi Students’ Union (KSU) lyngba kane ka kyrwoh ka pynbna sha baroh ki Khun ka Bri U Hynniewtrep ba ha kaba iadei bad ka mat jong ka lynti rel ha ki distrik jong ka Khasi bad Jaintia Hills ka seng kan ym shong kli kti hynrei kan iai ialeh tad haduh ba kane ka mat kaba ktah ia ka Ri bad ka Jaidbynriew yn lah ban pynsangeh noh tad haduh ynda la biang ki ain kiba lah ban teh lakam ia ka jingwan tuid ki bar jylla bad ki mynder ri ha kane ka thain.
Kum shi bynta ban pynsngewthuh kham janai ia ki paidbah ha kaba iadei bad ki jingma lada yn plie ia ka lynti rel sha kane ka thain, ka seng ha kine ki sngi kan sam ia ki sla lyngkdop kylleng ka Bri U Hynniewtrep ha kaba iadei ba ki jingma kiba ap ia ka jaidbynriew rit paid jong ngi lada ngi shah ia ka lynti rel sha kane ka thain ka jong ngi.
Kine ki sla lyngkdop ki batai bniah ia kiba bun ki jingduh nong lada ai lad ia ka lynti rel ban wan sha kine ki lum ki jong ngi khlem ki ain kiba khlain bad ba don iktiar ban teh lakam ia ka jingwan rung kyrthep ki mynder sha Ri Khasi. Kumta ka seng ka kyntu bad kyrpad ia baroh ki paidbah ban sngewbha ban pule ia kine ki sla lyngkdop khnang ba kin ioh ki jingtip kiba kham bniah ha kaba ia dei bad ka jingpyrshah ka seng ia ka lynti rel sha kine ki lum ki jong ngi.
Kane ka jingsam ia kine ki sla lyngkdop ka long tang ka jingsdang jong ka seng ban pynpaw ia ka jingpyrshah ia ka jingthmu ka sorkar jylla bad sorkar pdeng ban wanrah ia ka lynti rel shane. Shen ka seng kan sa pynbna sa kiwei pat ki lynti kiba kan shim ban pyni ia ka jingpyrshah ka jong ka ia kane ka jingthmu ka sorkar ban wanrah ia ka lynti rel ha kine ki thain ki jong ngi bad ka kyntu ruh ia ki paidbah ban ia snoh kti lang bad ka seng ban ialeh pyrshah ia kane ka jingthmu ka sorkar kaba long kum ka jingpynjot ia ka jaidbynriew rit paid ka jong ngi, la ong u Bah Rapborlang Nongrum Publicity Secretary Khasi Students’ Union.
