Shillong, Rymphang 03: U Chief Executive Member jong ka KHADC u bah Titosstarwell Chyne la iathuh ba ha ka jingialang jong ka United Democratic Alliance (UDA) kaba la long mynta ka sngi la shim ia ka rai ban pynieng ia u bah Lamphrang Blah kum u kyrtong ban ia khun ia ka ilekshon shongknor ha KHADC ka ban long la sngi Nyngkong ban wan.
Haba kren ha ki lat pathai khubor ha dien ka jingialang u CEM u la ong ba ka jingkhot ia kane ka jingialang jong ka UDA ka long ban ia kren ia u kyrtong ban ia khun ia ka ilekshon shongknor ha KHADC ka ban long ha sngi nyngkong ban wan ha kaba ka UDA kala rai ban pynieng ia u Bah Lamphrang Blah.
Bah Titosstarwell Chyne u la iathuh ha ka jingiatreilang ha KHADC kala don ka jingiakut ba ia ka kam Shongknor kan leit sha ka party NPP, ha dien ba la hiar shuki u bah Pyniaid Syiem ha dien ba la jop kum u MLA, ka NPP kala phah da ka jingthoh ba kila jied ia u Bah Blah ban mih bujli, kane ka jingialang mynta ka sngi ruh ka pynskhem ia kata.
Ka jingkhot kyrkieh ia kane ka jingialang ka long ba u Lat jong ka jylla khot ia ka dorbar kaba kyrpang ha ka sngi Nyngkong ha ka 7/02/2022 ha kane ka jingialang ka UDA la ia kren ruh ia kiwei kiwei kikam kum ka kynhun.
U nongialam ka liang pyrshah u bah PN Syiem haba kren ha u SP News Agency la ong ba kila rai ban nym pynieng kyrtong bad kin ai ka jingkyrshan ia u Bah Lamphrang Blah namar u la dei u MDC ba rim tam hapoh jong ka KHADC, ka liang pyrshah kan ai ka jingkyrshan ia u kyrtong ka NPP bala pynieng da ka UDA.
Ka jingthep kyrteng kan long la shai ka sngi shuwa ka 12.00 baje shiteng sngi bad ka jingrai ka liang pyrshah ban nym pynieng kyrtong u bah Lamphrang Blah un long u Shongknor ba thymmai jong ka KHADC.
