Shillong, Nailur 02: Ka jingpynpaw jong ki seng hapoh ka lama jong ka Joint Action Committee ia ka jingbymhun ia ka rai jong ka meeting kaba lah long mynnin ha KHADC, ka 1 tarik u August, bad ka jingiai dawa ia ka surok two lane wat hadien ki jingtip shai ba kane surok ka long ban pynsuk ia ka Jingthmu tih uranium,ka long ka ba sngewsih bad ka bym sngewtynnad.
Lada la ai lad ban shna ia ka surok two lane, ym don lad shuh da kumwei ban khang ia ka jingtih uranium ha ka jylla, namar kat kum ka Atomic Energy Act 1962 ka sorkar India ka lah ban khlong ia u uranium khlem da donkam ban ioh jingbit na ka sorkar jylla bad ka KHADC.
Ia kane la kren shai ha ka section 10 (Compulsary acquisition of rights to work minerals) bad ka section 11 (Compulsory acquisition of prescribed substances, minerals and plants) jong kane ka Act. Kumba kiwei ki seng ki la sngewthuh ia ka jingma jong kane ka surok two lane bad ki la ia mynjur lang bad ka rai ka KHADC ngi kyrmen ba ka JAC ruh kan pyrkhat bha ia ka jingma lada ailad ia ka surok two lane, lada ka pyrshah ia ka jingtih Uranium. La ong u bah Pyndap saibon president ka KHNAM.
