Shillong, Jylliew 09: U Director jong ka National Institute jong ka Technology, Meghalaya, u Bibhuti Bhushan Biswal u la ong ba 50 percent na ka jingdon ki jaka hapoh kane ka Institute la mang ia ki trai jylla bad kiba tam na kata ka long ia kiwei pat kiba na baroh kawei jong ka Ri India.
Haba kren ha ki nongthoh khubor mynta ka sngi u Biswal u la ong ba ynda la dep kane ka jingtei ia ka jaka pule kaba don ha Saitsohpen, ha Sohra kane ka jaka pule kan ngiam haduh 1260 ngut ki samla pule ki bynta bapher bapher bad ia kane ka jaka pule ym lah ban pyndep leh se ha u snem 2020 lane 2021 bad ka jinglut baroh kan long T.800 klur bad haduh mynta la pynlut T.156 klur.
La iathuh ba ia ki iing kiba don kam eh la dep ban tei mynta hynrei kin leit sha kane ka jaka ynda la dep lut baroh ki jingtei, la ong u Biswal bad kumba ka long mynta ka jingtrei ka iaid beit sha khmat. Kane ka jaka la ai da ka sorkar jylla bad ka jingheh kalong kumba 330 akar.
Ha kane ka jaka ai jinghikai kaba ki don mynta ha Laitumkhrah kilah ban pyniaid tang ha ki san tylli ki shnat jingpule lai tylli ha ka science bad ar tylli ha ka arts, ha ka science ki long ka Physic, Chemistry bad Mathematic bad ka arts. Kane ka jaka pule ruh kan sa sdang ia kine ki jingpule ba thymmai kum ka, Food processing, Mining Engineer, Chemical Engineer, Geological Engineer.
Ka jingthmu kaba kongsan jong kane ka jaka ai jinghikai ka long ban ai ka jinghikai ha kaba ia dei bad ki kor ki bor jong kane ka juk kaba mynta. Na ka liang jong u Diector u la pynsngew ba baklei ki briew ki phah ia khun jong ki ban pule sha bar haba ha kane ka jylla kila don ki lad jingpule.
