Shillong, Jylliew 17: K seng FKJGP jong ka Mawlai Circle mynta ka sngi kila leit ban ia kynduh ia u Bah Prestone Tynsong myntri ba deipeit ia ki kam pynroi nongkyndong. Ha kane ka jingiakynduh na ka liang jong ka seng kala dawa ba ia ka ophis jong ka Mawlai Block ka dei ban don ha u pud u sam jong ka Mawlai.
U Bah Marbut Dkhar haba kren ha ki lad pathai khubor u la ong ba ha kane ka jingiakren na ka liang jong u myntri u la kular ba ka ophis jong ka Mawlai Block ka dei ban don ha u pud u sam jong ka Mawlai, ia kane ka block yn sa plie ynda kila lah ban pynbiet pynbiang katkum ki jjingdon kam namar hap ban phiah ia ka Mylliem block.
Na ka liang jong u myntri u la ong ba la bthah ia u Deputy Commissioner jong ka East Khasi Hills ba jurip noh ha kaba ia dei bad kane ka kam bad ban shna ia ki Gramsevak circle. Kane ka jingleit jong ka seng ban ia kynduh ia u myntri ka long ban pynthinka ba kam dei ban leit sha kiwei ki jaka kumba ka la ong ha ka jingkren u myntri rangbah ba kan long ha Mawlai ka dei ban long ha mawlai.
Ka seng ka ong ba kane ka dei ka jingangnud jong ki paidbah ka Mawlai la bun bun snem bad mynta kala urlong, na ka liang jong ka seng ka kloi ban iarap ia ka sorkar lada ka don kam ban ioh jaka la ka dei na ki riew shimet lane na ki jaka sorkar kiba don bun ha Mawlai.
