Jowai, Iaiong 15: Ka pakhang shnong ba 24 kynta ha ka 16 tarik mynta u bnai naduh 5 baje mynstep haduh 5 baje jong ka step kaba bud ha East Jaintia HillsDistrict ba la khot pynlong da ka SRS-EJH, AJYWO-CB, KSU-JHDU, HNYF-EJZ, FKJGP-KC ban pynbor ia ka sorkar ban maramot noh ia baroh ki bynta bala sniew jong ka NH 44, kata naduh Soomer haduh Malidor kan iaid beit kat kum ba la pynbna.
“Ngin iaid beit bad ngin ym kynrad dien shuh . Hadien kane ka jingpakhang shnong, ngin sa peit la ka ki bor sorkar ba dei peit ia kane ka surok kin maramot ne em ia ka NH 44. Hynrei lada ka sorkar kam leh ei ei ngin dang bteng shuh shuh ia ki jingiakhih jong ngi”, Ong u Bah M H Dkhar President ka AJYWO Sengkmie.
“ U Bah M H Dkhar u la ong shuh shuh, “Ngi ngeit skhem ba baroh ki paidbah jong ka EJHD bad kiba na kiwei pat ki jylla jong ka thain shatei lam-mihngi jong ka Ri India ki la sakhi da la ki jong ki khmat halor ka jingsniew palat jong ka NH 44 naduh Malidor haduh Soomer bad kane ka jinglong ba isangsot jong kane ka surok bah jong ka Ri India (National Highway) ka la ktah ia baroh ki paidbah kiba ba pyndonkam ia kane ka surok kum u bud lum jong ki.”
Ka jingiakhih jong ka SRS-EJH, AJYWO-CB, KSU-JHDU, HNYF-EJZ, FKJGP-KC ka long kaba don nongrim bha namar kane ka dei ka ishu na ka bynta ka bha ka miat jong u paidbah ym tang jongka East Jaintia Hills hynrei jong ka thain shatei Lam-Mihngi jong ka Ri India.
Ka long kaba shisha ba ha ba ha kine ki sngi, ban iaid lynti na na kawei ka jaka sha kawei pat ha EJHD kan shim por da ki 4-5 kynta ha ka jaka tang kumba 10 minit namar ka jingsniew palat jong kane ka surok bah kaba la wanrah ia ka jingdheng kali baroh shi sngi man la ka sngi. Sa tang ki maw bad ki thliew ki krem kiba jylliew kiba la mih hapdeng jong kane ka surok bah.
Ki paidbah ki ba thmu ban leit trei leit ktah, ka sngi jong ki ka kut noh tang ha kaba shong kali baroh shi sngi katba ki kam jong ki ki sahkut khlem poi sha ei shaei ruh em. Kane ka la ktah shi katdei eh ia ka jakpoh jong ki, khamtam ki kup shilliang sem shilliang kiba im sngi ban kamai jakpoh lyngba ka NH 44. Yn nai ia kren ia kiba pang ba shitom.(SP News)
