Shillong, Lber 08: Ia ka phlim Khasi kaba kyrteng ka 9-Lad kaba dei ka phlim khasi kaba itynnad bha kaba la sdang ban pyni naduh ka 28 tarik Rymphang la hap ban sangeh noh ha kine ki khyndiat sngi namar ka jingpynjari ia ka curfew, hynrei naduh mynta ka sngi U Blei 8 tarik Lber la sdang ban pyni baroh 5 show kata ha ka por 11AM, 1PM, 3PM, 5PM bad 7PM. Bad kane ka jingpyni ka dang iai bteng.
Ha sngi ba la sdang ban pyni ia ka phlim 9-Lad ha ka 28 tarik, ka la pynkhein ia baroh ki record pyni phlim naduh ki phlim Hindi bad phlim Khasi halor ka jingioh lum pisa namar ka dei ka phlim khasi kaba nyngkong tam kaba lah ban kamai haduh T.5 lak ha ka shisngi bad kane ka dei namar ba ka phlim 9-Lad ka dei ka phlim kaba itynnad khamtam ha ka jingwanrah iaka khana.
Ha kine ki khyndiat sngi ki la don bun ki paidbah kiba la leit ban kyrshan bad la sakhi ruh iaka jingwan kyrshan jong ki nongrep khamtam ki dkhot jong ka Hill Farmers Union (HFU) namar ba u bah Commander Shangpliang uba dei u nongshna jong kane ka phlim u dei u President jong ka HFU.
Ia ka Phlim 9-Lad la sdang ban pyni biang naduh ka 4 tarik kata tang shishow hadien kane la sdang ban pyni 2 show ha ka 5 bad 6 tarik bad mynta ka sngi 8 tarik la sdang ban pyni baroh san show. Haba phai halor ka show mynta ka sngi baroh ki show la dap briew lait noh tang ha ka show kaba 7 baje la kham duna briew. Na ka liang jong ki paidbah ki la ai ka jingiaraoh halor kane ka phlim.
Na ka liang jong ki actor ba kynthup ia u Phira Dohtdong, Wanri Pyngrope, Goldenstar Suciang, Tracy Basaiawmoit bad kiwei kiba don bynta ki la kyrpad ia ki paidbah ban ai jingkyrshan ban wan peit ha Bijou Cinema Hall khnang ba kan long ka jingmyntoi ia ki nongshna bad kumjuh ruh ia ki nongiashim bynta. Ha Galleria Anjalee Cinema yn sdang ban pyni biang naduh ka sngi thohdieng.
Lah ban pynkynmaw ba ki MLA bad minister ba kynthup ia u bah Kyrmen Shylla, bah AL hek, bah HM Shangpliang bad kumjuh ruh u bah Renikton Lyngdoh Tongkhar kiba la peit shiteng jong ka phlim wat la kim shym la peit pynkut, hynrei ki la ai jingiaroh ia ka jingitynnad jong ka phlim 9-Lad.
