New Delhi, Rymphang 27: U Vice president jong ka Ri India u ba dei ruh u Chairman jong ka Rajya Sabha, u M Venkaiah Naidu u la ong ba ka Ri India ka dei ka Ri kaba kwah ia ka jingsuk, hynrei lada don ki riew sniew kiba wan ban pynthud ka kloi ban tangon ia ki bad ia kane la pynishai kdar da ka jingleit thep ki shipai suin ia ka ktem ki lehnoh ha Pakistan bad kala long kaba jop.
Ia kane u Vice Presidenr jong ka Ri India u la kren ha ka jingiakynduh mynta ka sngi bad ki khraw pyrkhat na ki 32 tylli ki ri jong ka pyrthei ha kaba plie ia ka “‘Kautilya Fellowship Programme” kaba la pynbeit da ka India Foundation. Ha kane ka sngi u Vice president jong ka Ri India u la ong ba ka jinghikai kaba ka Ri India ka don ka long “Ka pyrthei ka dei kawei ka iing” dei na kane ka daw ba ka India ka kwah ia ka jingsuk bad ia kane ka jingsuk ym lah ban shim ba ka dei ka jingtlot.
Ha kane ka jingiakynduh bad kine ki khraw pyrkhat jong ka pyrthei, u Vice President u la pyni ia ka jingleit ther ka Ri India ia ki jaka hikai jong ki lehnoh ha namar kane ka dei ka jingma bad ka jingpynthud ia ka shong suk shongsain ha ka Ri bad kine ki kwah ban pynthud ia ka jingsuk ka Ri India ka tip bha ia kane, dei na kane ka daw ba ki Ri jong ka pyrthei ki ai ka jingkyrshan. Ka Ri India kan nym lah ban shusngap ia ka jingleh jong ki lehnoh kiba khlem don kata ka jingsngew briew.
Na ka liang jong u Vice President jong ka Ri India u la kyntu ia ki ri jong ka pyrthei ba kin ieng tylli kawei ban ia khun pyrshah ia ki kam lehnoh bad ka Ri India kala dep ban ai jingmut sha ka United Nation ha u snem 1996 kaba dang sah teng haduh mynta. Ha ka juh ka por u la ong ba la don kam ban ialeh ban pynduh ia ka jingbei pisa ia ki kam lehnoh bad ki briew ba kyrshan ia ki kam lehnoh ki dei ban lehrain.
Ha kane ka jingiakren u Vice President ka Ri India u la ong ba ka Ri ba marjan khlem da jer kyrteng ia ka Pakistan u la ong ba kala ai jingkyrshan ia ki lehnoh kaba la ktah ia ka ioh ka kot jong ka. Ka Ri India ka kwah ban don ia ka jingshong suk namar kane ka dei ka thymmei na ka bynta ka roi ka par jong kano kano ka Ri. Ka Ri India ka dei ka ri synshar paidbah ha kaba baroh ki paidbah ki don ia ka hok jongki ban ai jingmut bad ka Ri India kala mad ia kane.
