Shillong, Lber 30: Ka Shilla Bishnab, ka samla kaba pule ha ka Class IX jong ka Jawahar Navodaya Vidyalaya, Mawphlang kan long kawei na ki samla pule na ka ri ban iashim bynta ha ka jingiaphylliew jingmut bad u Myntri Rangbah duh ka ri, u Narendra Modi ha ka bynta kaba 5 jong ka Pariksha Pe Charcha ha ka 1 tarik Iaiong, 2022.
Ka Shilla Bishnab kaba dap da ka jingkmen namar kane ka kabu kaba shisien ha ka jingim ka la ong ba kan iaphylliew jingmut kumno ka National Education Policy 2020 kan pynkupbor ia ki samla pule bad ia ka imlang sahlang hi baroh kawei nalor kumno kane ka policy kan prat lynti na ka bynta ka India kaba thymmai.
U Myntri Rangbah duh, u Narendra Modi un iaphylliew jingmut bad ki samla pule, ki nonghikai bad ki kmie ki kpa na kylleng ki ri ka pyrthei ha ka bynta ba 5 jong ka prokram Pariksha Pe Charcha bad ka samla pule jong ka JNV Mawphlang ka dap da ka jingsngewkmen na ka bynta kane ka prokram bad ka la ong kalong ka burom kaba khraw bad ka jingsngew sarong ia ka ban shah jied na ka bynta ka charcha bad ban ioh iamir jingmut bad u Myntri Rangbah duh ka ri, u Narendra Modi.
Ka Pariksha Pe Charcha kadei ka prokram kaba ju pynlong shisien shi snem ha kaba u Myntri Rangbah duh ka ri u jubab ia ki jingkylli ba iadei bad ka jingkhuslai jingmut namar ki eksamin bad kiwei kiwei ki bynta ba iadei bad kane ba ki samla pule ki buh jingkylli ha kane ka prokram kaba pyni live.
U Secretary jong ka Tnat Pule puthi, Meghalaya, u Ambrose Ch. Marak u la pynpaw ka jingkyrmen ba kane kan long ka khyllipmat kaba khraw na ka bynta ka samla pule na Meghalaya ban ioh iamir jingmut bad u Myntri Rangbah duh, da kaba pyntip ruh ba ka Tnat ka la pynkhreh na ka bynta ki samla pule bad ki nonghikai ha ka jylla ban peit ia kane ka prokram.
Ka bynta ba 5 jong kane ka prokram kan long ha New Delhi ha ka rukom iaphylliew jingmut kaba long ha Talkatora Stadium ha ka por 11 baje mynstep. Da ki klur ki samla pule, ki nonghikai bad ki kmie ki kpa na ka ri bad nabar ri kin iashim bynta ha kane ka prokram.
Ladep jied ia ki samla pule, ki nonghikai bad ki kmie ki kpa ki ban kylli jingkylli ia u Myntri Rangbah duh halor ka nongrim jong ka jingiakop thoh ba la pynlong online halor ki phang bapher bapher. Ia ka jingiakop thoh la pynlong naduh 28 tarik Nohprah 2021 haduh 3 tarik Rymphang, 2022 lyngba ka rynsan MyGov. Palat 15.7 lak ki nongiashim bynta ki la pynrung kyrteng mynta u snem na ka bynta ka jingiakop thoh jingthoh.
Ki nongiashim bynta kiba la shah jied lyngba ki jingiakop ha ka MyGov kin ioh ka certificate of appreciation bad ka Pariksha Pe Charcha kit ba kyrpang ba kynthup ka kot Exam Warriors, ba la thoh da u Myntri Rangbah duh ka ri.
Ka Pariksha Pe Charcha ka la long ka rynsan ha kaba u Myntri Rangbah duh u iakren markhmat bad ki samla pule. Ia kane ka prokram yn pyni, ym tang ha kylleng ka ri India, hynrei sha kiwei kiwei ki ri ruh kumjuh ha kaba u ai jingkren sha ki briew ka India kiba don ha kiwei kiwei ki ri.
Ia kane ka prokram yn pyni live telecast ha Doordarshan (DD National, DD News, DD India), ki radio channel, ki TV channel, digital media kynthup ki YouTube channel jong ka EduMinofIndia, narendramodi, pmoindia, pibindia, Doordarshan National, MyGovIndia, DDNews, RajyaSabha TV, Swayam Prabha.
