Shillong, Jylliew 21: Ki lai tylli ki seng bhalang, ka KFJGP, HNYF bad ka RBYF mynta ka sngi kila pynlong ia ka jingiakhih jong ki da kaba shong kyllain mungor ha khmat jong ka Additional Secretariat ban pyrshah ia ka jingshna ia ka lynti rel sha kine ki lum khasi.
Ha ka por lai baje noh phai sngi na ka liang jong u myntri kam poh ing ka jylla u Bah HDR Lyngdoh u la khot ia ki nongialam ban ia kren, ha kaba na ka liang jong ki seng bhalang kila ai ia ka dorkhas bad ha kane ka dorkhas kila thoh shai kdar ba ki pyrshah ia ka Lynti rel.
Ha dien ka jingiakren bad u myntri kam poh iing, u president jong ka seng FKJGP u Bah Wellbirth Rani haba kren ha ki nongthoh khubor u la ong ba, ha kane ka jingiakynduh ia u myntri kam poh iing na ka liang jong ki lai seng kila dawa ba ka sorkar ka dei ban pynsangeh shuwa ia ka jingshna ia ka lynti rel katba ym pat lah ban buh ia ki lad jingiada na ka jingwan tuid jong ki mynder Ri.
Na ka liang jong ki lai seng kila dawa na ka u myntri kam poh iing ba ka sorkar ka dei ban khot ia kren bad ki seng bhalang halor kane ka lynti rel, kynthup ia ka KSU, namar ka jingpyrshah ia ka lynti rel ka dei da baroh ki khatlai tylli ki seng bhalang ym tang ka KSU Marwei.
Haba ia dei bad ka jingthwet jong ki pulit ia ki nongialam jong ka seng KSU, ha kane ka sngi kila dawa na ka u myntri kam poh iing ba ka sorkar ka dei ban sangeh shisyndon bad ia kiba la shah kem ruh dei ban pynlait noh.
Ha kane ka jingiakynduh na ka liang jong u myntri kam poh iing u la ong ba ia kane ka jingiakren baroh yn sa rah ia ka khubor sha u myntri rangbah ka jylla u Dr Mukul Sangma u ban sa poi ha Shillong la shai ka sngi bad haba ia dei bad ka jingkem ia ki briew, na ka liang jong u myntri kam poh iing u la ong ba ka jingkem ka long ia ki nongleh kam sniew shimet ym ia ki dkhot jong ka seng KSU.
U Bah Sadon Blah president jong ka HNYF u la ong ba ha kane ka jingiakynduh kila dawa na ka u myntri kam poh iing ba ka sorkar ka dei ban pynkloi noh ban khot ia ka jingiakren namar ha ka synshar paidbah katba dang pynslem ia ka jingiakren kan dang jyrwit kiei kiei baroh. La ong ba ynda la dep ban ia kynduh bad u myntri rangbah kiei kiei baroh kila shai bad na ka liang jong ki seng bhalang ruh kin sngewthuh kumno ban leh ban pynsngeh ia kane ka jingshna ia ka lynti rel.
La ong ba ka dei ka Lynti rel ka dei ka kam jong ka sorkar pdeng bad ka North East Frontier Railway ka dei ka kontraktor, hynrei ka shong suk shong sain ha ka jylla pat ka dei ka kam jong ka sorkar jylla ym jong ka sorkar pdeng. Na ka liang jong ki lai seng mynta ka sngi kila kren shai ba ka sorkar ka dei ban pynbiang shuwa ia ki lad jingiada bad ia ka lynti rel kin sa ia kren ha dien.
