Shillong, Risaw 07: U myntri khynnah jong ka sorkar pdeng u Ramdas Bandu Athawale u ba dei peit ia ka tnad Social Justice bad Empowerment, u la ong ba un sa thoh sha u myntri rangbah ka jylla ba ka sorkar kan seng ia ka skul sorkar na ka bynta kiba don jingduna ha ki dkhot met na ka bynta ki khynnah pule kane ka jylla.
Haba kren ha ki lad pathai khubor ha dien ka jingialang bad ki heh sorkar na ka liang jong u myntri ka sorkar pdeng u la ong ba ka jylla Meghalaya ka don 12 tylli ki skul na ka bynta kiba don jingduna ha ki dkhot met bad ia kine ki skul la pyniaid da ki riew shimet. Na ka liang jong ka sorkar pdeng bad ka sorkar jylla kan bei pisa ia ki riew shimet ban seng skul na ka bynta jong kito kiba don ka jingduna ha ki dkhotmet.
Naka liang jong u myntri ka sorkar pdeng u la ong ba ha poh ka jylla Meghalaya ki don 44370 kiba don ka jingduna ha ki dkhot met katba hapoh ka Ri India baroh kawei ki don haduh ar klur ngut. La ong ba hapoh jong ka sorkar jylla ki don 75 ngut kiba don ka jingduna ha ki dkhot met kiba trei ha kit and sorkar bapher bapher.
Ha kane ka jingialang la bethah ia sorkar jylla ba ka dei ban but ia ka kyndon ba la buh ba ka sorkar ka dei ban man kam kyrpang 4% na ka bynta kiba don ka jingduna ha ki dkhot met. Ha kane ka jingialang la iathuh ba ka sorkar jylla kala ai T.500/- tyngka man u bnai na ka bynta ki 11695 kiba don ka jingduna ha ki dkhot met na ka skhim Chief Minister Social Assistance ia kiba don jingduna bad ia ki riew kynthei bum don tang shuh.
