Shillong, Naitung 15: U Symbut Myntri Rangbah ka jylla u bah Prestone Tynsong mynta ka sngi u la pyntip ba ka sorkar kala shim ia ka rai ban khangnoh shipor ki jaka rung sha ka jylla bad kane ka jingkhang kan long naduh ka por shiteng miet jong ka 23 tarik mynta u bnai haduh ka 31 tarik jong mynta u bnai.
Ia kine ki jaka rung yn sa sdang ban plie biang naduh ka 01th Nailar 2020, ki jaka rung ki ban khang ki long ka Ratachera, Mirjumla, Trikikilla, Bajengdoba, Hilagandi bad Byrnihat. Ia kiwei ki jaka kum ka Boko, Khanduli bad Umshit la aiti sha ki pulit ban leh ia kaba don kam.
Ha kane ka por ba khang ia ki jaka rung, la shah tang ia kito kiba leit ban sumar haba pang shitom, kiba kit ia ki marbam ki shipai, ki kynhun shipai bad ia ki kali ban leit sha Assam kiba hap ban iaid lyngba ka jylla Meghalaya.
U bah Prestone u la ong ba ka sorkar kala shim ia kane ka rai ka long ba ki nongtrei kiba don ha ki jaka rung kila thait palat namar mynta la saw bnai kila trei ha ka kam bad ki don kam ban shong thiat, ha kane ka por ki hap ban leit ban ia shim bynta ha ki jinghikai kaba yn sa pynlong ha ka jaka kaba ki don.
La iathuh ruh ba ha kane ka por kin pynkynriah ia ka jaka ktem kaba la buh ha Byrnihat kaba don mynta namar ka ktah ia ki briew jong ka jylla Assam, ia kane ka jaka peit bniah ia kiba rung ba mih sha Meghalaya yn pynkynriah noh sha jan jingkieng Byrhimat.
