Vellore, Naiwieng 12: Ka myntri ba dei peit ia ka tnad PWD shna iing ka kong M. Ampareen Lyngdoh,ha kaba la synran lang da u Parliamentary Secretary, Brigady N. Marak bad ki heh sorkar kila leit ban jngoh ia ka Meghalaya House kaba don ha Vellore .
Ha kane ka sngi ka myntri kala plié ia ka jaka shet kaba dang shna thymmai hapoh jong kane ka iing sorkar, kane kan ia rap shibun ia ki paidbah namar ba bun na ki briew jong ka jylla kiba leit sha katei ka jaka ki leit ban shah sumar hapoh jong ka C.M.C. Hospital, Vellore.
Ka sorkar kan ialeh ban pynbha ruh ia baroh ki iing jong ka sorkar kiba don sha bar jong ka jylla, ia kiba la tip kum ki Meghalaya House kaba don Delhi, Mumbai bad Kolkata, bad kaba kham kongsan eh ka dei kane ka iing kaba don ha Vellore namar ka ai jaka sah ia ki nongpang.
La kyntu ruh ia ki briew kiba leit ban sah ha kane ka iing sorkar ba kin ai jingmut kumno ban leh lada don kam ban kham pynbha shuh shuh ia kane ka iing jong ka sorkar kaba ai ka jingshakri ia ki paidbah jong ka jylla kiba leit ban shah sumar ha katei ka jaka.
