Shillong, Kyllalyngkot 13:ka General Executive Council jong ka Khasi Student Union (KSU) ha ka jingialang kaba la long mynta ka sngi kala shim ia ka rai ban dawa na ka sorkar ba ka dei ban pyntrei kam noh ia ka “comprehensive mechanism” ban ia da na ka jingwan tur ki mynder ri hapoh mynta u snem 2017.
Haba kren ha ki nongthoh khubor ha dien ba la wai ka jingalang jong ka GEC u president jong ka seng u Bah Daniel Khyriem u laong ba lada ka sorkar kam lah ban pyntrei kam sa shisien kin mih biang sha surok ban dawa ia ka Inner Line Permit.
Kumba la ia mynjur hapdeng ka KSU, kiwei kis eng bhalang bad ka sorkar ba baroh kin don 41 tylli ki jaka rung bad jaka mih jong ki briew kiba na bar lada ki wan sha kane ka jylla, na kine 18 tylli ki don ha ki bynta jong ka Ri Khasi bad 23 tylli ki don ha ki ri lum Garo, ka sorkar ka dei ban pyntreikam noh mynta u snem.
Haba ia dei bad ka Meghalaya safety and security Act, ka KSU ka dawa na ka sorkar ba ka dei ban pynbna noh ia ka jingpynbna sorkar ban buh noh ia ki District task force committee ha baroh ki District ha ka jylla khlem da pynslem shuh.
Haba ia dei bad ka kam Uranium ka seng ka dang ieng ha ka juh ka nongrim ban pyrshah beit ia ka kam tih Uranium ha kane ka jylla wad lada ka dei tang ka jingwad bniah ruh ha kaba ia dei bad u ne u marpoh khyndew.
Ha kane ka jingialang ka KSU ka dawa na ka District Council (KHADC) ba ka dei ban pyntrei kam noh ia ka arphew klur kaba la mang ban maramot ia ka surok na NOngstoin sha Phlangdiloin bad ia ka PHC kaba don ha Wahkaji ka sorkar ka dei ban plie noh.
Haba ia dei bad ka lynti rel ka seng ka dang ieng ban pyrshah katba ka sorkar kam pat lah ban pyntrei kam ia ki ain ha kaba ia dei bad ka jingkhang khyrdep ia ka jingwan rung jong ki briew kiba nabar sha kane ka jylla. Ia mynta ka seng kan pyrshah ia ka jingthmu jong ka sorkar ban wanrah lynti rel sha ki lum khasi.
Ha kane ka jingialang ka KSU kala thung ia u bah Dany Khyriem ban long Chairman jong ka Election Committee jong ka seng bad u bah Samuel B Jyrwa kum u Secretary na ka bynta ban pyniaid ia ka election jong ka seng kaban long ha 11.2.2017 ban jied ia ki nongkit kam ba thymmai jong ka seng na ka bynta jong u snem 2017 haduh 2020. Ia ka election yn pynlong ha Dinam Hall Shillong.
