Shillong, Jylliew 09: Ka Synjuk ki Seng Samla Shnong (SSSS), South West Khasi Hills District (SWKHD), ka la pynlong ia ka jingpynkhuid ia ka Wahsala. Ha kane ka sngi la iashimbynta da ki Samla kiba long ki dkhot jong ka SSSS, SWKHD, ki dkhot jong ki Seng Samla Shnong kiba na ki shnong kiba marjan bad ruh ki Khynnah Scout & Guides hapoh ka jingialam u Samla Batkupar Khardewsaw, Scout Master jong ka skul Maharam Govt. Hr.Sec, School, Mawkyrwat.
Ha shuwa jong ka jingpynkhuid la ioh ban sdang da ka jingialang kaba lyngkot kaba la lamkhmat da U Bah.Walambok Syiemiong, President, SSSS, SWKHD. U kongsan ha kane ka sngi u la long u bah.Sywell Lyngdoh, Asst, District Manager BDU, SWKHD. U kongsan ha ka jingkren jong u, u la banjur shaphang kumno ban pynmlien ialade kumno ban long baroabor kiba lehkhuid naduh na iing na sem haduh ka imlang ka sahlang, u la iathuh ruh shaphang kawei ka jingthoh jong u President barim bad la khlad noh jong ka ri India, u Dr.A.P.J.Abdul Kalam ka la khot “Ka shithi ba la thoh ha u snem 2070”,.
Ha kaba ha kane ka shithi u la thoh shaphang uwei u briew uba im ha katei ka snem, uba la bynnud shikatdei eh ia ka jingkhein sting bad ka jingbymsalia jong u ban pynneh pynsah ia Mei-Mariang. Une u briew u la kynmaw ia ka jingleh sahuh bad im pahuh pahai ia ka um bam um dih bad ka jingjyrngam jong kiei kiei kiba don sawdong sawkun jong u, katba ha katei ka snem 2070 ki briew kin nym lah ban im palat ia ka 35 snem namar ka jingtyrkhong jong ka pyrthei kaba u im nangta ki briew ba 35 snem karta i kumba ki dei ki briew kiba la 75 snem ka karta. Ha kane ka jingialang la ioh ruh ban sam ia ki kot lyngkdop (Appeal) sha baroh ki nongiashimbynta bad ruh sha ki nongshongshnong ha kiba shong ba sah ha syndah jong ka Wahsala.
Hadien kane ka jingialang la ioh ban iashimbynta shitrhem ban pynkhuid ia ki rud ki kiar jong kane ka wah. Ka Synjuk ka kyntu bad ka khot ka wer ia baroh ki nongshong shnong jong ka shnong Mawkyrwat bad ki Shnong kiba marjan ba kin sngewbha ban nym pynjakhlia ia kane ka wah kaba long kawei na ki wah kaba ai um ai dih ia ki paitbah. Ka Synjuk ka kyntu ruh ba ngin iai don ka mynsiem jong ka jingiatreilang ban pynlong ia kane ka wah kaba la buh bad la suit la shor da u Trai nongbuh nongthaw da kaba iai sumar, iai pynneh ia ka jingkhuid jingsuba jong ka, ka ban long ka jingkyrkhu ia ka mynta bad ka lashai jong ki khun ki ksiew jong ngi.
