Shillong, Rymphang 17: Mynta ka sngi ki nonghikai SSA hapoh jong ka lama Meghalaya SSA School Association (MSSASA) kila pynpaw ia ka jingsngewsih ba ka sorkar kam pat pynlait ia ka tulop jong ki kaba la san jan dap san bnai mynta.
Haba kren ha ki lat pathai khubor mynta ka sngi ha Shillong Press Club u bah Aristotle Rymbai la ong ba ka tulop kaba ki ioh shuwa u bnai Nohprah jong u snem 2021 dei tang na ka bynta ar bnai, u Nailur bad Nailar jong u snem 2021, kiba sah pat ka long na u Risaw 2021 bad mynta la iaid Rymphang 2022.
Kawei pat ka bynta ba ka seng ka kwah ban pynpaw ka dei ka halor ka jingbym pat siew ka sorkar ia ka T.104 klur tyngka kaba dei jong ki nonghikai kaba ka sorkar jylla ka dei ban thep bhah halor kane ka seng kala dep ban phah ia ka jingthoh sha ka sorkar ba kan pynlait ia kane ka pisa.
Kane ka pisa kaba ka sorkar jylla ka dei ban thep bhah ka long kaba sah bad ka sorkar jylla mynta la lai snem lynter, ka seng ha u bnai Nohprah ka seng kala thoh biang ia ka shithi sha ka sorkar ba kan pynlait ia kane ka pisa.
Namar ka sorkar kam shym la pynlait ia kane ka pisa, na ka liang ka seng kala shim ia ka rai ban pan da ka RTI ban tip kham bniah ha kaba ia dei bad kane ka pisa kaba T.104 klur dei ha u bnai Kyllalyngkot 2022 ba kila ai ia ka RTI bad mynta kila ioh ia ka jingtip.
Katkum ka shithi kaba la phah da u secretary ka tnad pule puthi jong ka jylla sha u Director Institutional Finance jong ka sorkar Meghalaya ban bthah ban pynlait ia kane ka pisa T.104 klur katkum ki kyndon kiba la buh da ka SSA.
Bah Aristotle la ong ba ki nonghikai SAA ha ka jylla Meghalaya, kiba dei ha ki skul Lower primary School ki don 5814 ngut bad ka jingsiew ka long T.19044/- marwei bad na ka bynta ki Upper Primary School ki nonghikai ki don 6727 ngut bad ka jingsiew ka long T.2493/- tyngka marwei.
Haba ia dei bad kane ka jingsiew ka na ka bynta ki LP School ka long kumba T.132 klur shisnem bad ia ki UP School ka long kumba T.165/- klur tyngka shisnem bad lada khein ha ka shisnem baroh ka long T.298/- klur ha ka shisnem, ka sorkar pdeng ka bei T.266.10 klur tyngka bad kaba duna ka sorkar kan sie kumba T.32.19 klur tyngka shisnem.
