Shillong, Naitung 06: Ka Joint Action Committee of Social Organization (JACSO) jong ka thain South West Khasi Hills ki dawa na ka Uranium Corporation of India Limited (UCIL), ba ka dei ban weng noh ia ka tender kaba la khot ha ka 30 tarik jong u Naitung mynta u snem kaba thmu ban tih noh ia u Uranium na katei ka thain.
U Chairman jong ka JACSO u Bah Wallam Syiemiong u la ong ba kane ka jingjia baroh ka dei na ka daw ba ka sorkar kam shym la ai ka jingshai kaba biang halor kane ka kam, tang ka kam ban shna surok ruh pat dep ia kren mynta la khot sa ka tender ban tih Uranium.
Ka phang jingia kren ka dang long tang halor ka surok ban shna na Nongstoin sha Mawthabah ia ka two lane hynrei mynta la ai da ka tender ban tih ia u Uranium, ka seng ka pynrem jur ia baroh ki bor sorkar kiba ia dei bad kane kam ia ka jingleh khun jakai ia kane ka kam.
Katkum ka tnder kaba la khot da ka UCIL ka long ba kino kino kiba kwah ban thep ia kane ka tender ka sngi ba khatduh ban pynpoi ia ki kot ki sla kanlong ha ka 31 tarik mynta u bnai, na ka bynta ki jingtrei bapher bapher kumba la kdew ha ka tender.
U Chairman jong ka JACSO u la ong ba kane ka jingle jong ka sorkar jylla bad baroh kiba ia don bynta ha kane ka kam kila shet ia ki paidbah jong kane ka jylla, ka jingtip ka jong ki ba ki ioh halor kane ka jingthmu tih uranium dei na ka tender kaba la khot da ka UCIL.
