Shillong, Rymphang 19: U Myntri ba dei peit ia ka tnad sam um ka jylla u Marcuise N Marak haba jubab ia ka jingkylli u bah Synshar Kupar Roy Lyngdoh Thabah la ong ba ki don bun tylli ki tyllong um kiba sam um sha ki iing ki sem ban pynpoi lyngba ka skhim Jal Jevan Mission.
Haba ia dei bad ka Nongbah Shillong, u myntri la ong ba ka Umiew kan long ka tyllong umdih ia ka nongbah Shillong bad ia ka New Shillong Township kan long noh ka wah Umkhen, kane kan long ka tyllong na ka bynta katei ka sor ka ban dang mih thymmai.
Haba jubab ia ki jingkylli bynrap na ka liang jong u myntri la ong ba ka sorkar kala shim bun ki lat ki lynti ban iada ia ki tyllong um, da kaba thung dieng ne da kaba ia treilang bad ki shnong ki thaw ban pynneh pynsah ia ka mariang.
U myntri rangbah ka jylla u Conrad K Sangma haba iarap ban jubab halor kane ka jingpynneh ia ki tyllong um, la ba lyngba ka skhim MegArise, ka sorkar kan pynlut ban pynneh sah ia ki ar tylli ki tyllong um ka wah Umiew bad ka wah Ganol ka long T.344 klur tyngka.
La pyntip hapoh ka iing dorbar thawain ka jylla bad a ka jingiatreilang bad ka North Eastern Space Application Centre ban jurip ia ki tyllong um bad la shem ba ki don haduh 50000 tylli um ha kane ka jylla baroh kawei bad ka long ka sien kaba nyngkong ha ka jylla ban don ia ka State Water Policy.
