Shillong, Risaw 24: Ha ka jingplie ia ka ophis trei kam jong ka party NPP ha Ampati South West Garo Hills u National President jong ka seng NPP ha ka sngi nyngkong u la ong ba ka seng kan ioh ban thaw ia ka sorkar marwei ha u snem 2018, la ong ban a Khasi Hills kin jop la kumno kumno ha ki 18 tylli ki Constituency na ki 36 tylli bad ha Garo Hills na ki 24 tylli ki constituency kin jop kumba 15 tylli, la ong u Conrad Sangma ha ka jingialang paidbah.
Ha kane ka jingialang paidbah kaba la long ha Ampati na ka liang jong u Conrad u la ong ba, dei tang ka party NPP kaba lah ban pynkhyllem ia ka seng Congress kaba la pyndon kam bakla ia ki sorkar jong ka ha kane ka jylla. La ong ba don ki MLA Congress bad MLA jong ka UDP kiba la tyrwa ban wan sha ka NPP.
Na ka liang jong u Conrad u la ong ba ka jingbym shaniah shuh jong ki paidbah ia ka seng Congress ka long haba ka sorkar Congress ka leh ei ei ka leh tang na ka bynta ki briew jong ki ym na ka bynta jong ki paidbah. Dei na kane ka daw ba ki paidbah jong ka jylla Assam, Arunachal Pradesh bad Manipur ki sa kyntait ia ka seng Congress.
Ha kane ka jingialang paidbah la pdiang burom ruh ia u Youth President jong ka Congress u ba la pyniasoh ia lade sha ka seng NPP, u Dipu Koch. Ha kawei pat ka jingialang paidbah kaba la long ha Congnapara u Conrad u la ong ba Botham K. Sangma u la long u ba la bit la biang ha kane ka kam ban pynsngew ia ka jingeh jong ki paidbah hapoh ka iing dorbar.
Ha kitei ki jingialang paidbah u Conrad u la ong ba kum u MP jong ka Tura u la kren ia ka jingeh jong ki paidbah jong ka Garo Hills, jong ka jylla, jong ka dong shatei Lam Mih ngi jong ka Ri India bad kham tam eh ia ka jingeh kaba ki riewlum ki ia kynduh bad kum ki Khriatan kiba dei ki Ri paid.
